iklan

EKONOMIA, HEADLINE

Governu no USAID lansa relatóriu anuál KIDT

Governu no USAID lansa relatóriu anuál KIDT

Ministru Koordenadór Asuntu Ekonómiku, Joaquim Amaral. Imajen Tatoli/Francisco Sony

DILI, 20 setembru 2022 (TATOLI)—Governu Timor-Leste liuhosi Ministériu Turizmu Komérsiu no Indústria (MTKI) no Ministériu Koordenadór Asuntu Ekonómiku (MKAE) hamutuk ho parseiru USAIDs Tourism For All, tersa ne’e, lansa relatóriu anuál hosi Komisaun Interministeriál ba Dezenvolvimentu Turizmu (KIDT), hahú juñu 2021 to’o juñu 2022.

Ministru Koordenadór Asuntu Ekonómiku (MKAE), Joaquim Amaral, hateten, VIII Governu estabelese ona atividade KIDT no Unidade Téknika bazeia ba despaixu Primeiru-Ministru ho númeru 024/PM/VI/2019 atu fó kompeténsia másimu ba MKAE lidera KIDT.

“Ohin reuniaun Komisaun Interministeriál ba setór turizmu, ne’ebé lidera hosi MTKI tanba setór turizmu ne’e hola parte iha Timor-Leste ninian diversifikasaun ekonómika, tanba ne’e MKAE lidera Komisaun Interminiateriál ida-ne’e no halo koordenasaun atubele haree dezenvolvimentu setór turizmu hanesan dezenvolvimentu ne’ebé hetan apoiu hosi ministériu xave sira tanba ita presiza tau-atensaun boot ba infraestrutura turizmu,”  Ministru hateten iha salaun TradeInvest, Colmera, tersa ne’e.

Notísia relevante: Governu no USAID aprezenta dezenvolvimentu Cristo Rei ba setór privadu

Lansamentu livru ne’e hanesan dokumentu progresu serbisu no dezafiu ne’ebé KIDT halo ona no sei halo tan.

“Ami sei finaliza lalais planu estratéjiku turizmu,” nia akresenta.

Durante ne’e Komisaun Interministeriál hasoru dezafiu hanesan membru balun ladún iha partisipasaun másimu iha reuniaun, orsamentu ba Sekretariadu la sufisiente inklui laiha espasu hodi halo serbisu regulár no fó apoiu tékniku ba funsionáriu UT no KIDT rasik.

“Haree hosi dezafiu sira, ita rekomenda atu aloka orsamentu iha Orsamentu Jerál Estadu (OJE) 2023, ba serbisu Sekretariadu hodi halo koordenasaun no atividade sira iha Komisaun Interministeriál no presiza partisipasaun másimu hosi membru Governu,” nia tenik.

Rekomendasaun seluk mak MTKI nu’udar responsável ba asuntu tékniku iha área turizmu nian presiza koordena di’ak no presiza konvida setór privadu sira-nia reprezentante sira hodi halo diskusaun ho konsulta kona-ba polítika Governu iha área turizmu liuliu planu estratéjiku nasionál turizmu.

Iha biban hanesan, Ministru Turizmu Komérsiu no Indústria, José Lucas da Silva do Carmo, hateten, progresu iha área turizmu nian mak liuhosi MKAE, MTKI no Sekretária Estadu Formasaun Profisionál no Empregu (SEFOPE) konsege hala’o transferénsia ofisiál sítiu turizmu One Dollar Beach no Weluli Manas liuhosi SEFOPE ba MTKI.

“Nune’e enkontru liña ministeriál ne’e importante tebes atu ko’alia kona-ba infraestrutura bázika nian, oinsá kona-ba konektividade aviaun tanba ida-ne’e importante no sai dezafiu ba turizmu rai-laran tanba billete mai ita-nia rai ne’e karun, nune’e ohin ne’e bele halo diskusaun no buka solusaun,” nia dehan.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!