HEADLINE, KAPITÁL, NASIONÁL

Timor-oan iha posibilidade hela permanente iha Austrália

Timor-oan iha posibilidade hela permanente iha Austrália

Embaixadora Timor-Leste iha Austrália, Inês Almeida. Imajen Tatoli/Francisco Sony

DILI, 20 setembru 2022 (TATOLI)–Embaixadora Timor-Leste iha Austrália, Inês de Almeida, informa, timor-oan ne’ebé hatene ko’alia lian inglés no prienxe rekezitu posibilidade bele hela permanente iha Austrália.

“Austrália hakarak aumenta sira-nia imigrasaun iha Austrália, entaun sira loke dalan ba timor-oan no mós ema sira rai pasífika, ne’e signifika katak timor-oan sira ne’ebé iha abilidade no mós hatene ona inglés bele aplika ba pacific engagement visa, katak bele hela permanente ona iha Austrália,” Embaixadora hateten bainhira relata asuntu ne’e ba Primeiru-Ministru (PM), Taur Matan Ruak, iha Rezidénsia Farol, tersa ne’e.

Notísia relevante: Empreza Thomas Foods kompromete rekruta timor-oan serbisu iha Austrália

Maibé kestaun ne’e sei iha prosesu diskusaun entre Governu Timor-Leste no Austrália tanba ne’e foin proposta hosi Governu australianu.

“Ida-ne’e sei iha diskusaun hela, Austrália sei konsulta ho parte hotu hanesan empregadór, Governu, Xefe Misaun iha Austrália, liuliu nasaun pasífiku sira hanesan Vanuatu, Tonga, Samoa, aseita ka lae ita-nia ema sira bá bainhira iha viza hela ona iha Austrália, bele lori fe’en, oan, sei hetan hotu direitu eskola, serbisu depois hela permanente iha ne’ebá, tanba ne’e maka ha’u hasoru Primeiru-Ministru atu informa katak iha ona dalan timor-oan imigra bá Austrália,” nia esplika.

Diplomata ne’e dehan, kada tinan sira fó oportunidade ba ema na’in-3.000, maibé númeru ne’e la’ós de’it ba Timór maibé ba mós sidadaun hosi Vanuatu, Tonga, Samoa, Fiji, Papua Nuguini.

“Maneira aplika ne’e maka sei tama iha lotaria, depois hili númeru ida ne’ebé aplika ona ba trata viza. Kritéria aplika ba viza tenki ko’alia lian inglés no iha abilidade serbisu iha área sira hanesan enjeñeiru, mekániku no seluk tan,” nia tenik.

Durante ne’e timor-oan sira bá serbisu iha Austrália no hetan visa depende kuandu sira bá serbisu kuu ai-fuan ho durasaun viza fulan-neen maibé iha ona mudansa hosi fulan-neen ba fulan-sia.

“Primeiru-Ministru dehan ein prinsípiu nia hatán ho ideia ida-ne’e,” nia subliña.

Jornalista   : Antónia Gusmão

Editora        : Julia Chatarina

iklan
iklan

4 Comments

Leave a Reply

iklan
error: Content is protected !!