iklan

BOBONARO, ELEISAUN, HEADLINE, MUNISÍPIU, POLÍTIKA

CNE esklarese aktu eleitorál ba estudante DMCL Maliana no Cristal

CNE esklarese aktu eleitorál ba estudante DMCL Maliana no Cristal

CNE hala'o edukasaun sivika ba estudante sira iha Maliana. Imajen Tatoli/Sergio da Cruz.

BOBONARO, 21 setembru 2022 (TATOLI)–Komisaun Nasionál ba Eleisaun (CNE, sigla portugés), kuarta ne’e hala’o edukasaun sívika, hodi esklarese aktu eleitorál ba estudante eskola Sekundáriu Jerál Dom Martinho da Costa Lopez (DMCL) númeru I Maliana no estudante sira hosi eskola Cristal.

Atividade ne’e realiza iha Jináziu Maliana ne’ebé lidera hosi Vise-Prezidente CNE, Domingos Barreto, ho Tema “Promove esklarese kona-bá aktu eleitorál no rezilénsia Covid-19” ba eleitór sira-ne’ebé hetan apoia hosi United Nations Devolopment (UNDP) Covid-19 Resilient Elections in Timor-leste (CORE-TL).

Vise Prezidente CNE, Domingos Barreto, esplika edukasaun sívika ne’e hanesan atividade dinámika ne’ebé haree hosi ema-nia moris, hahú hosi joven ho idade tinan 16 ba leten, atu hasa’e sira-nia koñesimentu nune’e bele partisipa iha eleisaun tuir regra no lei ne’ebé vigora iha Timor-Leste.

Notisia relevante: CNE sei introdús sistema biométriku iha Eleisaun Parlamentar 2023

Domingos subliña, atividade ne’e labele hein de’it tempu eleisaun tinan lima mak foin realiza dala-ida.

Tanba tuir nia eperiénsia iha nasaun Angola, órgaun eleitorál sira hala’o edukasaun sívika kobre populasaun tomak nune’e durante prosesu eleisaun laiha eleitór ida mak ezerse nia direitu ho votu nulu no branku.

Nia dehan, estudante sira mak joven ne’ebé sai futuru ba nasaun ida-ne’e, ne’e duni presiza estuda didi’ak lala’ok eleisaun atu fó kontribuisaun ba nasaun liuhosi ezerse direitu votu iha eleisaun ho loloos.

“Ami hahú no depois imi tenke kontinua, tanba edukasaun sívika ne’e importante tebes, ha’u husu imi akompaña didi’ak matéria sira ne’e, la komprende buat ruma bele husu, ami sei esplika hotu, pelumenus sai hosi ne’e bele iha ona hanoin ruma,” nia fó hanoin ba estudante sira.

Diretór Sekretariadu Tékniku Administrasaun Eleitorál (STAE), munisípiu Bobonaro, Mariano Viegas Amarál, reforsa, atividade ne’e atu lori estudante sira koñese serbisu saida mak órgaun eleitorál halo, lala’ok resensiamentu eleitorál no atualizasaun baze dadus.

Nune’e mós aprende sistema eleisaun prezidensiál, parlamentár no eleisaun konsellu suku tanba durante ne’e estudante sira barak mak seidauk iha koñesimentu.

“Ha’u husu ba ita-boot sira katak informasaun sira-ne’ebé ohin imi hetan hatutan fali ba família no viziñu, atu nune’e bele hatene sistema eleisaun no hatene órgaun eleitorál nia kna’ar no kompeténsia,” nia hateten.

Reprezentante Prezidente Autoridade Munisípiu Bobonaro, Egídio Siga-Mau, agradese ba órgaun eleitorál tanba kontinua implementa atividade ne’e, tanba ne’e husu ba estudante sira-ne’ebé atinje ona idade tinan 16 atu hahú trata kartaun eleitorál.

“Imi iha direitu atu hasai kartaun eleitorál, agora tinan 17 ona imi mós iha direitu atu ba vota, entaun liuhosi prosesu edukasaun sívika ida-ne’e atu fó koñesimentu ba imi, tanba ita-boot sira ne’e foin primeira vez atu hatene saida mak CNE no STAE nia serbisu,” nia akresenta.

Partisipa iha atividade ne’e komposta hosi Komandante Operasaun Polísia Munisípiu Bobonaro, Inspetór Xefe Armando Sila, reprezentante UNDP-CORE-TL no estudante balun hosi Universidade de Dili (UNDIL).

Notisia relevante: CNE elabora planu estratéjiku hodi guia instituisaun ho di’ak

Jornalista        : Sérgio da Cruz

Editór              : Evaristo Soares Martins

iklan
iklan

Leave a Reply

iklan
error: Content is protected !!