NASIONÁL, POLÍTIKA

Conselho de Imprensa sei revoga deliberasaun kona-ba prémiu Max Stahl

Conselho de Imprensa sei revoga deliberasaun kona-ba prémiu Max Stahl

Presidente CI, Virgílio da Silva Guterres. Imajen TATOLI/Antonio Goncalves.

DILI, 22 setembru 2022 (TATOLI)–Prezidente Conselho de Imprensa (CI), Virgílio da Silva Guterres, hateten se Parlamentu Nasionál aprova ona projetu rezolusaun ba prémiu Max Stahl, nune’e posivelmente CI hanoin sei revoga desizaun kona-ba prémiu refere, atu nune’e labele iha prémiu rua ho naran hanesan.

Notísia Relevante: PN aprova regulamentu atribuisaun prémiu Liberdade Espresaun Max Stahl

“Primeiru mak ami hanoin atu revoga deliberasaun ne’ebé mak Konsellu Imprensa fó sai kona-ba premiu Max Stahl nian. Depois, ba oin mak diskute kona-ba kategória dokumentáriu audio vizuál, ita uza fali jornalista seluk nia naran hanesan jornalista Agus Muliawan iha Lautém no seluk tan,” Virgílio hateten ba Agência Tatoli, iha nia kna’ar fatin Quintál Boot, Dili, kinta ne’e.

Ida-ne’e akontese, tuir nia, tanba de’it falta komunikasaun entre parte rua, Parlamentu Nasionál no Conselho de Imprensa, nune’e naran prémiu Max Stahl nian hanesan.

“Infelizmente ami Konsellu Imprensa lahetan informasaun ka komunikasaun ruma hosi Parlamentu Nasionál (PN), tanba ida-ne’e mak CI mós lansa tiha ona prémiu ho naran Max Stahl ba produtu jornalístiku dokumentáriu aúdio vizuál. Ha’u pesoalmente foin hatene horisehik katak PN aprova ona rezolusaun ba prémiu Max Stahl. Purtantu, PN hanesan órgaun soberanu iha kompeténsia polítika tomak atu halo rezolusaun ne’e maibé ba ami importante mak presiza iha komunikasaun,” Virgílio hateten.

Tanba, nia dehan, Conselho de Imprensa (CI) mós entidade Estadu ida, nune’e asuntu ida liga ho Liberdade Imprensa no jornalizmu nian ne’e pelumenus iha komunikasaun ho Conselho de Imprensa.

“Maibé ida-ne’e CI la halo protestu ruma ba asuntu ne’e tanba PN órgaun soberanu ne’ebé aas liu maibé komuniksaun importante ba ita. CI lamenta mak ami laiha komunikasaun hosi PN kona-ba prémiu Max Stahl ne’e. Se CI mak organizasaun baibain karik laiha problema maibé tanba entidade Estadu nian ne’ebé mak lei mós fó kompeténsia, CI bele fó rekoñesimentu ba jornalista sira,” nia hateten.

Se Parlamentu Nasionál aprova ona rezolusaun no aprova regulamentu atribuisaun prémiu liberdade espresaun Max Stahl, husik PN mak la’o de’it ona tanba ierarkiamente PN aas liu CI tanba prémiu nia valór mós makaas liu CI nian.

Ho ida-ne’e, nia hateten, Conselho de Imprensa bele hanoin fali bainhira enkontru plenária hodi deside fila-fali atribui kategória dokumentária ba fali jornalista seluk ne’ebé mate iha Timor-Leste.

“Ami sei diskute tanba uluk mai foti tanba atu fó onra, fó rekuñesimentu ba Max Sthal no ami lansa ona depois loke tiha ona konkursu. Maibé, ha’u pesoalmente sé mak konkorre no bainhira hetan ninia vensedór ne’e, ami sei atribui permiu iha loron nasionál Liberdade Imprensa (16 outubru) iha Balibo,” nia dehan.

Orsamentu ba komemorasaun loron nasionál Liberdade Imprensa ne’e kuaze $30,000.

Aleinde ne’e, Conselho de Imprensa husu PN atu bele institui mós Balibo Five hanesan prémiu aas liu jornalista iha Timor-Leste.

Notísia Relevante: Selebrasaun loron Nasionál Liberdade Imprensa sei realiza iha Balibo

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!