NASIONÁL, OPINIAUN

Komité 12 Novembru sente onradu Arsebispu Peña Parra vizita semitériu Santa Crúz

Komité 12 Novembru sente onradu Arsebispu Peña Parra vizita semitériu Santa Crúz

Vise Primeiru-Ministru Santa Sé, Arsebispu Edgar Peña Parra halo’o vizita ba Semitériu Santa Cruz, hodi tau ai-funan iha kruz boot, kinta (22/09/2022). Imajen Tatoli/António Daciparu.

DILI, 22 setembru 2022 (TATOLI)—Prezidente Komité 12 Novembru, Gregório Saldanha “Mouris”, sente onradu tanba Vise Primeiru-Ministru Santa Sé ne’ebé substitui hosi Sekretária Estadu, Arsebispu Edgar Peña Parra, ho delegasaun hala’o vizita ba semitériu Santa Crúz.

Notísia Relevante: Arsebispu Peña Parra agradese PN aprova lei migrasaun no azilu

Vise Primeiru-Ministru Santa Sé, Arsebispu Edgar Peña Parra, simu hosi Prezidente Komite 12 Novembru, Gregorio Saldanha, bainhira hala’o vizita ba Semitériu Massacre 12 novembru, Santa cruz, kinta (22 setembru 2022) Imajen Tatoli/António Daciparu.

“Timor-Leste espesialmente Komíte 12 Novembru no ita hotu sente onradu no agradesidu tanba Santu Padre nia enviadu espesiál Vice Primeiru Ministru, Sua Selénsia Edgar Peña Parra mai vizita semitériu Santa Cruz, ida-ne’e ami no ita hotu sente oportunu los tanba mai vizita fatin ida ne’ebé mak ita terus fatin, fatin ida ne’ebé mak halo ita hamutuk, fatin ne’ebé mak halo problema Timor-Leste moris nafatin,” Gregório Saldanha hateten ba jornalista sira, iha semitériu Santa Crúz, Díli, kinta ne’e.

Semitériu Santa Cruz hanesan fatin ne’ebé mak transforma mate ba moris tanba ema hotu hatene katak transforma mate ba moris la’ós ema mate moris fali maibé TL nia situasaun polítika, problema Timor-Leste ne’e moris fali kuandu ema mate.

“Mate sira-ne’e halo Timor-Leste nia problema moris nafatin iha mundu Internasionál no ohin loron ita independente. Entaun, prosesu ne’e tomak, hamutuk prosesu seluk, kiik ka boot no uitoan ka barak kontribui lisuk ba Timor-Leste nia independensia ne’ebé ohin ita sente,” nia dehan.

Maske nune’e, nia sente vizita Arsebispu Edgar Peña Parra ho delegasaun ne’e hanesan sentidu reforsa Timor-Leste nia kristanidadi no espíritu fé nian hodi fiar ba Maromak.

Vise Primeiru-Ministru Santa Sé, Arsebispu Edgar Peña Parra halo’o vizita ba Semitériu Santa cruz, hodi tau ai-funan iha kruz boot, kinta (22/09/2022) Imajen Tatoli/António Daciparu.

Politika mós iha nia sentidu hotu tanba srsebispu hanesan mós Vice Primeiru-Ministru ema polítiku no hanesan Estadu vatikanu ne’ebé mai hanesan rekuñesimentu ida ba mós luta Timor-Leste iha momentu ne’ebá, no to’o ohin loron TL independente mós timoroan lahaluha istória ba kotuk.

Nune’e, nia dehan, ida-ne’e hanesan rekuñesimentu ida ba prosesu ida la’o iha tempu naruk ba kotuk, tanba Santa Crúz bele mós reprezenta TL nia prosesu seluk ne’ebé ke ema la hatene, ema haluha no ema la haree, entaun Santa Crúz reprezenta Povu Timor-Leste nia terus iha momentu ne’ebá.

“Prosesu ne’e la’o to’o 1999, prosesu seluk fali ona maibé nia orientasaun hanesan de’it lori Timor-Leste ba mundu atu Timor-Leste bele hetan lai Independénsia,” nia hateten.

Entretantu, Vise Primeiru-Ministru Santa Sé ne’ebé substitui hosi Sekretária Estadu, Arsebispu Edgar Peña Parra ne’ebé halo vizita ba semitériu Santa Crúz ne’e hetan akompaña hosi Núncio Apostólika Rezidente iha Malázia no Enkarregadu Negósiu Rezidente iha Timor-Leste no Reprezentante Santa Sé iha Timor-Leste.

Notísia Relevante: Vise PM Santa Sé: Timor-Leste nasaun dahuluk proklama fraternidade umana

Jornalista : Nelia Fernandes

Editor       : Cancio Ximenes

iklan
iklan

Leave a Reply

iklan
error: Content is protected !!