Top

PN deside bankada parlamentár mak aprezenta kandidatu ba prémiu Max Stahl

Max Stahl. Imajen/Espesiál

DILI, 23 setembru 2022 (TATOLI)—Prezidente Parlamentu Nasionál, Aniceto Longuinos Guterres Lopes, informa iha tinan ida-ne’e Parlamentu Nasionál la loke ba públiku atu aprezenta kandidatu maibé PN fó direitu ba bankada parlamentár no deputadu sira mak aprezenta kandidatu ba prémiu Liberdade Espresaun Max Stahl.

Notísia Relevante: PN aprova regulamentu atribuisaun prémiu Liberdade Espresaun Max Stahl

“Aprezentasaun kandidatu ba prémiu Max Sthal ba tinan ne’e, PN fó de’it direitu ba bankada parlamentár no deputadu sira mak aprezenta kandidatu ba prémiu Max Stahl maibé sei la loke ba públiku atu aprezenta sira-nia kandidatura,” Prezidente PN ne’e hateten ba jornalista sira iha Parlamentu Nasionál, sesta ne’e.

Tanba, nia dehan, agora tempu badak loos entaun ba tinan dahuluk ne’e PN fó de’it direitu ba bankada parlamentár no deputadu ida-idak mak aprezenta kandidatu tuir rekezitu ne’ebé iha regulamentu rezolusaun, ne’ebé foin dadauk Parlamentu Nasionál aprova ona.

Ba tinan dahuluk ida-ne’e, nia dehan, prémiu ne’e di’ak liután tanba foufoun Parlamentu Nasionál aprova rezolusaun institui prémiu liberdade espresaun Max Stahl ho osan $5.000 de’it, maibé foin dadauk plenária Parlamentu Nasionál aprova fali rezolusaun ida hodi aumenta osan to’o $10.000.

“Kada lejislatura muda maibé ba lejislatura tinan ida-ne’e prémiu ba Max Shal ne’e ninia montante mak $10.000,” nia hateten.

Prosesu tomak, tuir nia, tanba iha kemomorasaun loron nasionál juventude iha loron 12 Novembru ne’e tenke atribui prémiu ba manán-na’in, nune’e ekipa juri mós iha ona no sira mak sei selesiona kandidatu sira-ne’ebé naran tama.

“Agora prosesu hahú hela. Ha’u husu deskulpa ba mídia, jornalista tomak no ba públiku, aprezentasau kandidatu sira, agora la loké ba públiku no kada sidadaun ida-idak bele aprezenta ninia kandidatura maibé tanba tempu badak loos ona entaun bankada parlamentár mak aprezenta kandidatu sira,” nia hateten.

Nune’e, tinan ne’e hanesan tinan dahuluk PN realiza prémiu liberdade espresaun Max Stahl la loké ba públiku atu aprezenta kandidatu maibé iha tinan oin PN sei loké ba públiku atu aprezenta sira-nia kandidatura.

Notísia Relevante: Conselho de Imprensa sei revoga deliberasaun kona-ba prémiu Max Stahl

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!