DILI, 26 setembru 2022 (TATOLI)—Komisaun G trata asuntu Edukasaun, Juventude, Kultura no Sidadania iha Parlamentu Nasionál (PN), diskute ona projetu-lei númeru 41/V(4a)-Kódigu Direitu Autór iha faze espesialidade iha komisaun diskute to’o artigu 80 ona.
Notísia Relevante: Komisaun G konvida entidade relevante diskute projetu-lei kódigu direitu autór
“Projetu-lei ne’e iha artigu hamutuk 224, iha semana kotuk diskusaun faze espesialidade iha komisaun diskute to’o ona artigu 80, no diskusaun iha proposta balun tama iha artigu balun elimina no balun adita hadi’a,” Prezidente Komisaun G, António Verdiál de Sousa, informa ba jornalista sira iha Parlamentu Nasionál, segunda ne’e.
Debate espesialidade komisaun sei kontinua debate kada artigu no tuir planu sei termina iha semana tolu nia laran no bainhira finaliza komisaun prodús relatóriu no paresér hodi hato’o fila-fali ba meza Parlamentu Nasionál ajenda ba iha plenária hodi bele aprovasaun finál globál.
Antes ne’e komisaun mós halo audiénsia ho entidade sira hanesan Universidade Nasionál Timor Lorosa’e (UNTL), Tribunál Rekursu, Ministéiru Públiku, organizasaun ALMAMOR no entidade seluk.
“Nune’e daudaun iha diskusaun komisaun iha faze espesialidade kontinua hela,” nia dehan.
Deputadu Verdiál hateten, objetivu hosi projetu-lei ne’e atu promove no defende sosiedade jerál ho nia fundamentu obra intelektual ne’ebé mak reprezenta obra literaria, artistika no sientífiku hosi autór sira presiza hetan salvaguarda hosi sistema kódiku autór ne’ebé dadaun deskute hela.
Antes ne’e Parlamentu Nasionál aprova projetu-lei ne’e iha faze jeneralidade ho votu a-favór-52, kontra no abstensaun 0.
Notísia Relevante: PN aprova projetu-lei Kódigu Direitu Autór iha faze jeneralidade
Jornalista : Nelson de Sousa
Editór : Cancio Ximenes