PN hato’o sentidu kondolénsia ba falesimentu Jape Kong Su

DILI, 27 setembru 2022 (TATOLI)—Parlamentu Nasionál (PN), hato’o sentidu kondolénsia ba falesimentu na’in ba Timor Plaza, Jape Kong Su no família.
Notísia Relevante: PR Horta hato’o sentidu kondolénsia ba falesimentu Jape Kong Su
“Simu informasaun kona-ba hakotu iis emprezáriu Timoroan, Jape Kong Su, ho ida-ne’e hanesan Liquiça-oan no reprezentante povu hato’o sentidu kondolénsia profunda ba família,” Sekretária Meza PN, Lídia Norberta, hato’o liuhosi reuniaun plenária, tersa ne’e.
Nia dehan, kontribuisaun Jape iha dezenvolvimentu nasaun hanesan konstrusaun Timor Plaza, no kontribuisaun sira seluk iha postu administrativu Maubara, munisípiu Likisa.
Nune’e mós Deputadu KHUNTO, António Verdiál, lori partidu nia naran hato’o sentimentu profunda kondolénsia ba família Jape Kong Su.
Deputadu ne’e triste ho falesimentu ne’e tanba Timor-Leste lakon ema extraordináriu ida di’ak tebes ne’ebé kontribui makaas ba dezenvolvimentu nasaun.
Nia konsidera Jape Kong Su ninia partisipasaun direta iha dezenvolvimentu no iha ekonómia nasionál ema-ne’ebé dinámika tebes, kria empregu ba timoroan barak.
Notísia Relevante: PM konsidera Jape Kong Su sai fonte inspiradór ba joven timor-oan
Jornalista : Nelson de Sousa
Editór : Cancio Ximenes

