BOBONARO, 29 setembru 2022 (TATOLI) — Diretór Sentru Solidariedade Sosiál no Inkluzaun munisípiu Bobonaro, Francisco Tilman, informa, dadus totál benefisiáriu subsídiu $200 iha munisípiu Bobonaro, sei aprezenta iha loron 10 fulan-outubru atubele halo pagamentu fim do ano ne’ebé tuir oráriu sei lansa iha loron 16 fulan-novembru 2022.
Nia dehan, provizóriu daudaun totál seidauk iha tanba sei halo hela verifikasaun lista anteriór no foun balun suku 50, aldeia 193 iha postu administrativu neen, tanba uma-kain balu naran mai, uluk konsege hetan sibsídiu maibé tinan ne’e naran la mai fali no balu naran iha eleitorál ema seluk nian.
Notísia relevante: Subsídiu $200 ba uma kain sei lansa iha 16 novembru
“Ita-nia munisípiu Bobonaro númeru ha’u seidauk simu dadus finál tanba sei verifika hela, loron 10 outubru mak ami sei hasoru malu iha-ne’e, tanba loron 5 to’o 6 ne’e ha’u sei enkontru iha Dili hodi haree karáter pagamentu ba munisípiu Bobonaro ne’e uma-kain hira,” nia ko’alia iha Maliana, kinta ne’e.
Francisco akresenta, subsídiu tinan nia rohan ne’e ho karáter universál tanba ne’e ema hotu ne’ebé forma ona uma-kain iha direitu atu hetan inklui mós órgaun soberanu sira hanesan Prezidente Repúblika, Primieru Ministru, Prezidente Parlamentu Nasionál no Prezidente Tribunál Rekursu.
“Maibé iha espsaun karik iha ema-boot ruma, tantu prezidente repúblika, ministru, diretór balu ka kompañia balu ne’ebé sente katak, osan ne’e merese liu ba família ida-ne’e, entaun nia bele entrega direita ba família sira-ne’e, maibé la taka dalan ba kualkér sidadaun sér de’it iha direitu ba subsídiu ne’e,” nia katak.
Diretór Francisco hatutan, bazea ba diploma ministeriál númeru 49/2019, 23 agostu hosi Ministériu Administrasaun Estatál (MAE) fó-sai katak última rejista to’o 28 de fevereiru 2022.
“Ba maluk sira-ne’ebé maka foin forma uma-kain, foin hetan fixa família ne’e aguenta hein lai tinan oin,” nia fó hanoin.
Tuir dadus monografia munisípiu Bobonari iha aldeia 193, suku 50, postu administrativu neen ho totál populasaun 128,522, kompostu hosi mane 70,687, feto 57,835 ho totál xefe família 28,490.
Notísia relevante: Governu deside uma-kain hotu simu subsídiu $200
Jornalista : Sérgio da Cruz
Editór : Evaristo Soares Martins
