iklan

NASIONÁL, POLÍTIKA

Semana oin, MAPKOMS aprezenta estabelesimentu Institutu Formasaun Jornalista ba PM

Semana oin, MAPKOMS aprezenta estabelesimentu Institutu Formasaun Jornalista ba PM

Prezidente FFTL, Francisco Martins da Costa Pereira Jerónimo. Imajen TATOLI/Egas Cristóvão.

DILI, 29 setembru 2022 (TATOLI)—Ministru Asuntu parlamentár no Komunikasaun Sosiál (MAPKOMS), Francisco Martins da Costa Pereira Jerónimo, informa semana oin MAPKOMS sei aprezenta estabelesimentu Institutu Formasaun Jornalista ba Primeiru-Ministru, Taur Matan Ruak.

Notísia Relevante: MAPKOMS sei diskute ho PM kona-ba estabelesimentu Institutu Formasaun ba Jornalista

“Ida-ne’e polítika ne’ebé mak presiza diskute didi’ak ho Primeiru-Ministru no ha’u loloos iha semana kotuk halo ona enkontru ho Primeiru-Ministru, tanba semana ida laiha enkontru. Entaun ha’u tau hela iha ajenda bainhira ha’u kuandu enkontru semana oin semanál nian, ha’u sei aprezenta ba Primeiru-Ministru kona-ba prosesu ne’e rasik,” Francisco Martins da Costa Pereira Jerónimo hateten ba jornalista sira, bainhira finaliza enkontru ho Ministériu relevante kona-ba instalasaun futuru edifisiu Parlamentu Nasionál (PN), iha Palásiu Governu, Díli, kinta ne’e.

Antes ne’e, nia dehan, bainhira Governu atu halo buat ruma, tenke informa posibilidade sira-ne’e ba Primeiru-Ministru hodi hanoin, tanba estabelesimentu Institutu Formasaun Jornalista mós la’ós buat ki’ikoan ida.

Antes ne’e, Ministru Asuntu Parlamentár no Komunikasaun Sosiál (MAPKOMS), Francisco Martins Pereira Jerónimo, informa ona katak MAPKOMS simu ona relatóriu hosi Sentru Formasaun Téknika Komunikasaun (CEFTEC-sigla portugés) no sei hasoru Primeiru-Ministru (PM), Taur Matan Ruak, hodi diskute kona-ba estabelesimentu Institutu Formasaun ba Jornalista iha Timor-Leste.

“Ha’u simu ona relatóriu estabelesimentu institutu formasaun ba jornalista hosi CEFTEC) maibé ha’u sei haree lai posibilidade, depois sei ko’alia ho Primeiru-Ministru. Tanba, ita atu halo buat ida tenke informa posibilidade sira-ne’e ba Primeiru-Ministru hodi hanoin, tanba ne’e mós la’os buat kiikoan. Ne’ebé, ha’u simu ona relatóriu no haree ona, depois ha’u sei ko’alia ho Primeiru-Ministru,” nia hateten.

Tuir nia, relatóriu hosi Sentru Formasaun Téknika Komunikasaun (CEFTEC-sigla portugés) ba Estabelesimentu Institutu Formasaun ba Jornalista ne’e, hanesan relatóriu informátivu kona-ba semináriu no opiniaun sira atu harii institutu refere.

Jornalista : Nelia Fernandes

Editor      : Cancio Ximenes

iklan
iklan

Leave a Reply

iklan
error: Content is protected !!