iklan

DILI, POLÍTIKA

Xefe Estadu prefere subsídiu $200 fó ba família vensimentu ki’ik-ki’ak sira

Xefe Estadu prefere subsídiu $200 fó ba família vensimentu ki’ik-ki’ak sira

Prezidente Repúblika, José Ramos Horta, hala'o nia viazen ba Austrália ho aviaun Qantas Link, iha Aeroportu Internasionál Nicolau Lobato Dili, segunda (05/09). Imajen Tatoli/Francisco Sony

DILI, 29 setembru 2022 (TATOLI)—Prezidente Repúblika (PR), José Ramos Horta, prefere polítika Governu fó subsídiu fim do ano $200 ba uma kain ne’e, di’akliu fó de’it ba família vensimentu ki’ik no família ki’ak sira.

Notisia Relevante: Subsídiu $200 ba uma kain sei lansa iha 16 novembru

“Buat rua, ida se bele di’akliu Governu fó de’it ba komunidade ne’ebé empregu laiha ka sira-nia rendimentu ki’ik loos. Solusaun seluk, ita ida-idak ho nia konxiénsia fó osan ne’e ita fó tun ba sira-ne’ebé osan laiha,” PR Horta hateten ba jornalista sira iha aeroportu internasinál Nicolau Lobato, Comoro, hafoin fila hosi vizita Estadu ba Nova Iorke, kinta ne’e.

Xefe Estadu hateten, kna’ar Prezidente Repúblika nia-parte asume ninia vensimentu 50% fahe ba organizasaun balun tau matan ba ema ki’ak sira-ne’e, hahú kedas iha juñu seidauk fó osan ne’e akumula hela to’o novembru ka dezembru mak entrega.

Planu ida-ne’e la’ós primeiravés nia-parte hala’o maibé iha ninia mandate dahuluk nu’uar Prezidente Repúblika dahuluk nian mós halo ona asaun ida-ne’e.

“Uluk ha’u nunka ko’alia ba ida-ne’e mais hakarak klarifika ba hotu-hotu, ha’u-nia vensimentu ida-ne’e, aliende  ne’e perdiem ne’ebé ha’u simu balun la gasta tanba Governu sira selu ha’u-nia ótel, balun gasta duni hanesan Nova Iorke laiha Governu ida bele selu maibé fatin balun nein doit metan ida ha’u gasta maibé iha direitu ba perdiem,” nia dehan.

Ida-ne’e mós nia-parte entrega ba fundu espesiál ida iha prezidénsia hodi bele fahe ba individuál ka organizasaun ruma servisu di’ak tau matan ba ki’ak sira.

Ho ezemplu ida-ne’e, nia hateten, timoroan hotu-hotu pelumenus manán $1000 ba leten di’akliu subsídiu fim do ano $200 ne’e fó ba ema ki’ak sira.

“Se Governu hateten hotu-hotu simu duni entaun ita fó tiha osan ne’e $200 hanesan ne’e, ita-nia kontribuisaun natál nian ba ema ki’ak sira,” nia degan.

Maibé, nia hateten, di’akliu Governu halo desizaun polítika ida hanesan ajuda espesiál dahuluk Governu fó iha 2020 ba de’it ba sira-ne’ebé manán vensimentu kada fulan menus hosi $500 ne’e karik di’akliu.

Notisia Relevante: Governu deside uma-kain hotu simu subsídiu $200

Jornalista: Nelson de Sousa

Editór: Cancio Ximenes

iklan
iklan

Leave a Reply

iklan
error: Content is protected !!