BOBONARO, 30 setembru 2022 (TATOLI) – Ministériu Solidariedade Sosiál no Inkluzaun (MSSI) liuhosi sentru soslidariedade sosiál munisípiu Bobonaro, planeia lori sidadaun moras mentál ne’ebé koñesida iha Maliana ‘Nando Pinki’, ba halo tratamentu iha kliníka Laklubar, munisípiu Manatuto iha fulan-novembru.
Sidadaun ne’e sofre moras mentál hosi suku Ritabou, postu administrativu Maliana no koñesida ho naran ‘Nando Pinki’ atu ba halo tratamentu saúde mentál iha kliníka Laklubar.
Diretór sentru solidariedade sosiál, munisípiu Bobonaro, Francisco Tilman, esplika, planu ne’e trasa desde kedas mandatu diretór sesante, maibé la konsege realiza tanba parte família lakohi koopera ho governu atu trata dokumentu sira.
Notísia relevante: Pasiente moras mentál na’in 10 halo tratamentu saúde iha Laclubar
Maibé Domingos Mama-Mia nu’udar sidadaun moras mentál ne’e nia maun rasik iha segunda, 05 setembru ne’e asina ona karta aseitasaun ho governu.
“Ami hein de’it karta atu ba foti señor ‘Nando Pinki’ parese iha iha novembru laran ami tenke ser lori ba Laklubar, maibé ami sei hetan hosi DNPDP iha nasionál tanba bazea mós ba orsamentu,” nia informa ba Tatoli, iha Maliana.
Francisco akresenta, prosesu tratamentu ba sidadaun moras mentál sira iha Laklubar haan orsamentu maka’as oituan, tanba selu ema-hein, família ne’ebé akompaña durante fulan ida ka rua mós estadu mak sei fó-haan to’o ema-ne’e rekupera, hafoin re-integra ba família.
Maibé Diretór ne’e haktuir, razaun família koordena ho parte MSSI atu transporta sidadaun moras mentál ne’e ho razaun hakarak fila-fali ho kondisaun normal.
“Ita haree iha sosiedade ne’e problema sosiál, kuandu ema moras mentál sira-ne’e la’o ba-mai ho tipu ‘la uza ropa’, depois naran hakuak malu arbiru de’it, ne’e difikulta prosesu edukasaun formál ba labarik minoridade,” nia akresenta.
Alende ne’e ‘Nando Pinki’, parte MSSI mós planeia sei lori tán sidadaun moras mentál na’in-rua ho naran ‘Mali Holsa’ no feto ida ho naran ‘Rita’, maibé sei hein karta aseitasaun tanba daudaun ne’e tékniku sira tún ona ba terrenu atu halo mediasaun ho parte família, maibé seidauk iha kooperasaun diak.
“Ha’u haree Mali ne’e mós dalaruma uza ropa no dalaruma mós lae, depois mana ‘Rita’ ne’e mós dalaruma mak uza vestidu de’it, dalaruma tuur arbiru de’it. Ita hanoin tebes, hakarak ka lakohi labele iha tontonan públiku, maibé ita hakarak sira-ne’e tau duni iha fatin sira hanesan Laklubar,” nia hateten.
Durante ne’e sentru solidariedade sosiál mós identifika sidadaun moras mentál ne’ebé rejista aas liu iha postu administrativu Cailaco no Balibo tanba ne’e parte governu serbisu hamutuk ho PRADET, Uma Mahon Maria Tapo no VPU mós konsege fó ona apoia nesesidade bázika.
“Ha’u atu fó hanoin de’it ba ita-nia komunidade sira hotu katak, moras mentál ho maluk sira defisiénsia agora iha organízasaun sira-ne’ebé bele haree, tanba ne’e bele hakbesik-aan mai ami atu ita bele kanaliza iha idak-idak nia fatin,” nia apela.
Notísia relevante: Klibur Domin Fó Tratamentu ba Ema Moras Mental ho Defisiénsia
Jornalista : Sérgio da Cruz
Editór : Evaristo Soares Martins
