DILI, 04 fevereiru 2022 (TATOLI)—Diretór Nasionál Promosaun Diretu Ema ho Defisiénsia, husi Ministériu Solidaridade Sosiál no Inkluzaun (MSSI), Mateus da Silva, relata nia parte servisu hamutuk ho PRADET hodi evakua pasiente moras mentál hamutuk na’in 10 bá Sentru Saúde Laclubar hodi halo tratamentu saúde durante tinan 2021.
Pasiente Saúde mentál na’in 10 ne’e kompostu husi mane na’in tolu no feto na’in hitu ne’ebé identifikadu maihosi Munisípiu Dili, Ermera no Lautém.
Notísia Relevante :PNTL preokupa ho ema moras mentál iha Dili
“Ami servisu hamutuk ho PRADET hodi transfere kedas ba sentru tratamentu Lackubar. Bainhira ema ne’e rekupera ita sei re-integra ba komunidade depois ita haree ba nia dezenvolvimentu kondisaun mak 100% mak ita sei haruka nia tuir formasaun sira ne’ebé eziste iha munisípiu,” Mateus hateten ba Tatoli, iha Caicoli Dili.
Nia dehan depois remata formasaun iha área kostura, ospitalidade no seluk tan, ekipa tékniku husi MSSI sei fasilita pasiente moras mentál hirak ne’e hodi buka servisu iha loja ne’ebé persiza atu emprega tan traballadór sira.
PRADET sensibiliza informasaun kona-ba saúde mentál ba Konsellu Suku Madohi
Psychosocial Recovery and Development in East Timor (PRADET), sesta ne’e hala’o sensibilizasaun informasaun ba Konsellu suku Madohi no komunidade, Dom Aleixo, munisípiu Dili kona-ba promove saúde mentál.
Koordenadór Programa Asisténsia ba Moras Mentál, Nicolau Vicente Ximenes, hateten objetivu hosi formasaun ne’e hodi sensibiliza informasaun ba autoridade lokál sira kona-ba saúde mentál, nune’e sira bele prevene no koidadu sira-nia aan kona-ba saúde mentál.
“Oinsá sira bele tulun komunidade, liuliu família no membru família sira ne’ebé mak sofre moras mentál atubele hetan tratamentu iha fasilidade saúde no mós bele livre hosi asaun estigma no deskriminasaun hosi komunidade ein-jerál,” Nicolau Vicente Ximenes informa ba Agência Tatoli, iha sede suku Madohi, Dili.
Materia kona-ba saúde mentál no moras mentál, maneja emosaun hosi situasaun tristeza no trauma maka partilla durante programa sensibilizasaun informasaun ne’e.
Nune’e mós materia estigma no deskriminasaun hasoru ema ho problema mentál, inklui sistema referál, oinsá mak autoridade lokál no komunidade sira bele kontaktu ho organizasaun sira-ne’ebé servisu iha área ne’e.
Programa sensibilizasaun informasaun ne’e hala’o durante loron rua hahú iha 03 to’o 04 fevereiru, ho totál partisipante hamutuk ema na’in 30, kompostu hosi autoridade lokál suku Madohi, delegadu, delegada, reprezentante juventude feto no mane, inklui komunidade.
Notísia Relevante :Ema Moras Mental 48 Halo Tratamentu iha Laclubar
Jornalista : Osória Marques/Nelia Fernandes
Editór : Agapito dos Santos
