DILI, 30 setembru 2022 (TATOLI)-Xefe bankada hosi partidu Frente Revolusionária Timor-Leste Independente (Fretilin) no Kmanek Haburas Unidade Nasionál Timor Oan (KHUNTO), prefere subsídiu tinan rohan $200 fó ba família rendimentu ki’ik no vulnerável sira.
“Dolar 200 fó ema sira ne’ebé saláriu ki’ik ho ema sira laiha reseita, hanesan agrikultór sira. Ha’u pelumenus la’ós la konkorda desizaun Governu nian, maibé pesoalmente husik ba ema sira tanba ha’u manán ona osan, iha regalias, tanbasá mak ha’u tenke simu tan”, Xefe Bankada Fretilin, David Dias Ximenes Mandati, ba jornalista sira iha uma fukun, sesta ne’e.
Hanesan deputadu, nia hatutan tan: “Governu nia servisu, ha’u fiskaliza de’it, ita bele deputadu no membru Governu, maibé ida-idak nia hanoin no presiza ka lae ne’e husu ba Governu”.
Notísia relevante: Xefe Estadu prefere subsídiu $200 fó ba família vensimentu ki’ik-ki’ak sira
Hanoin hanesan mai hosi Xefe Bankada KHUNTO. Deputada Olinda Guterres hateten, subsídiu ne’e loloos fó ba família ho kondisaun moris ki’ak ka susar tebes. “Ba ha’u nia haree osan $200 ba ema ne’ebé presiza tebe-tebes, la’ós ba fali Prezidente Repúblika, Deputadu no la’ós ba fali ema ne’ebé moris di’ak ona”.
Nia husu ba governu atu haree no hanoin didiak bainhira aplika subsídiu ne’e ba ema hotu-hotu, tanba sei halo ema sai barukten, hakarak hein de’it osan hosi Governu. “Hau rejeita no sei la simu subsídiu ne’e, tanba osan ne’e ba ema ne’ebé kbi’it laek”.
Notísia relevante: Governu deside uma-kain hotu simu subsídiu $200
Jornalista : Nelson de Sousa
Editora : Rita Almeida
