iklan

DILI, HEADLINE, POLÍTIKA

Deputadu sira husu ba mídia atu la destrui imajen lider Igreja Katólika

Deputadu sira husu ba mídia atu la destrui imajen lider Igreja Katólika

Vise Primeiru-ministru Santa Sé, Arsebispu Edgar Peña Parra simu husi Prezidente Parlamentu Nasionál, Aniceto Longuinhos Guterres Lopes, bainhira halo visita kortezia ba Parlamentu National, sesta 23 setembru 2022. Imajen Tatoli/Antonio Daciparu

DILI, 03 outubru 2022 (TATOLI)-Deputadu sira hosi bankada Frente Revolusionária Timor-Leste Independente (Fretilin), Partidu Demokrátiku (PD) no Kmanek Haburas Unidade Nasionál Timor Oan (KHUNTO) liuhosi deklarasaun polítika iha plenária, segunda ne’e husu ba mídia sira atu la destrui imajen lider Igreja Katólika.

Deputadu hosi bankada Fretilin, Aniceto Guterres, Antoninho Bianco no Marito Mota, enkuantu hosi PD, António da Conceição Kalohan, no husi KHUNTO, António Verdial, Olinda Guterres no  Luis Roberto hato’o sira-nian solidariedade ba Bispu Dom Carlos Filipe Ximenes Belo, relasiona ho notísia pedofilia hosi mídia Holandes De  Groene Amsterdam.

Antoninho Bianco husu ba mídia rai-liur no rai-laran atu ho laran di’ak fó kontribuisaun ba prosesu libertasaun povu nian, la’ós atu halo buat ne’ebé destrui imajen lidér istóriku iha Igreja Katólika, no mós iha polítiku nian.

“Bibi atan di’ak Dom Carlos Ximenes Belo, FRETILIN horik ho ita hodi uluk kedas no povu hodi luta halo buat ne’ebé imposivel sai posivel. Tanba ne’e aproveita husu Vatikanu katak bele hasai desizaun saida de’it, maibé labele rona de’it ba ema ida ka rua, reprezenta nia-aan hodi halo klandestina lia-bosok hodi tama iha Vatikanu”, nia dehan.

Deputadu Marito Mota husu ba Bispu Belo atu forsa hasoru situasaun hotu. Enkuantu, deputadu Aniceto Guterres hanesan mós Prezidente Parlamentu Nasionál (PN) hateten presiza buka hatene motivu husi denúnsia ne’e.

António Kalohan konsidera notísia hosi De Groene Amsterdam fó ameasa ba timor-oan nian unidade no fiar hanesan Katólika.

“Agostu liu-bá, timoroan hotu haksolok tanba Santa Sé hili Arsebispu Dioseze Dili nu’udar Kardeál. Ita mós orgullu tanba ukun-aan lori mós mudansa markante ba Igreja nia prezensa iha Timor hodi iha ona Nunsiatura mesak, iha nia diplomata ida”, katak nia.

Tuir nia notísia mídia internasionál ne’e halo kanek sarani Timor no basa ida ba Igreja lokál ho liman subar nian ida, maibé ita bele husu tanbasá mak situasaun ne’e foin mosu agora.

Tanba ne’e, nia husu ba Ministéiru Negósiu Estranjeiru no Kooperasaun (MNEK) atu ko’alia ho representante Nunsiatura iha Timor-Leste atu halao knaar diplomásia Santa Sé nian ho loloos, komprende kultura povu ida ne’e ho didi’ak molok hasai informasaun ruma.

“Husu mós atu organizasaun oi-oin ne’ebe servisu iha Timor respeita kultura povu nian hodi buka forma ne’ebé di’ak atu hato’o informasaun”, nia afirma.

Nia hatutan tan: “Labele uza ami nia frakeza atu hasa’e mós imi ba iha tronu leten aas ba. Se ohin ami iha diferensa hanoin, tanba ami nia kapasidade atu bele tau ami nia kbiit no beran hamutuk mak ladauk, mas ne’e la signifika ami labele”.

Vise Bankada KHUNTO, António Verdiál de Sousa, husu PN atu hasa’e orasaun espesiál ba bibi atan di’ak no aman Dom Carlos atu nia nafatin korajen hasoru ema ne’ebé atu hamonu nia.

Xefe Bankada, Olinda Guterres, dehan nia-parte haree jornalista internasionál balun ne’ebé serbisu iha Timor-Leste, sira agora foka liu ba kazu ne’e. “Ha’u husu ba jornalista internasionál balun ne’ebé serbisu iha Timor-Leste, hatudu dadus primária, la’ós interpreta de’it artigu ida ne’ebé  Olandés públika ne’e”, katak nia.

Hatán ba deklarasaun polítika sira ne’e, Governu liuhosi Ministru ba Asuntu Parlamentár no Komunikasaun Sosiál (MAPKOMS), Francisco Jerónimo, rejista hela no sei hato’o kestaun sira ne’ebé konsidera atu Governu haree, liuliu sujestasaun ligadu ba MNEK ninian.

Notísia relevante: CET kontinua akompaña kazu abuzu hasoru minoridade iha TL

Jornalista       : Nelson de Sousa

Editora           : Rita Almeida

iklan
iklan

Leave a Reply

iklan
error: Content is protected !!