DILI, 04 outubru 2022 (TATOLI)–Diretór Eskola Ensinu Sekundáriu Jerál (ESJ) 05 maiu Becora, Adelino Nicolau Ornai, haruka ona pedidu ba Diresaun Servisu Edukasaun Dili no Ministériu Edukasaun Juventude no Desportu (MEJD) atu husu tan profesór 12 apoiu profesór 52 iha ensinu aprendizajen ba estudante 2.050.
“Hafoin ha’u asume pasta, seidauk to’o fulan-ida ha’u haruka ona pedidu ba Edukasaun Munisípiu no nasionál hodi husu tan profesór 12 atu reforsa prosesu ensinu aprendizajen iha eskola ne’e, maibé sira foin bele responde de’it profesór rua, ne’ebé semana ne’e profesór sira bele mai aprezenta-an ona iha eskola,” Diretór hateten ba Agência Tatoli, iha Eskola ESJ 05 maiu Becora, tersa ne’e.
Notísia relevante: MEJD prepara kontratu ba profesór voluntáriu 2.111 submetidu vaga
Tuir responsável eskola ne’e, profesór rua ne’e sei reforsa ensinu aprendizajen iha matéria kímika no portugés tanba durante ne’e kolokasaun profesór ba matéria sira ne’e limitadu inklui profesór ba matéria desportu to’o agora seidauk iha.
“Ami presiza tan profesór desportu rua, tuir pedidu ne’ebé ami husu, maibé parte ministériu seidauk responde. Tanba ne’e, parte eskola durante ne’e fó atividade seluk atu estudante sira bele hetan matéria ruma,” nia akresenta.
Aleinde ne’e, Diretór eskola dehan, eskola públika ne’e sempre hasoru difikuldade, liuliu kona-ba karga oráriu ba profesór 52.
“Loloos kada semana sira hanorin iha oras 24 nia laran, maibé sira barak mak hanori kuaze oras 32 to’o 36 kada semana. Tanba ne’e, eskola presiza tan profesór atu ida-idak bele kumpre karga oráriu ho loloos,” nia tenik.
eskola halo pedidu ne’e hodi husu ba Ministériu Edukasaun atu aumenta tan profesór ba eskola 5 de Mai ne’e atu profesór ida-idak bele kumpre sira nia karga oráriu ho loloos.
Jornalista : Tomé Amado
Editora : Julia Chatarina
