iklan

HEADLINE, MUNISÍPIU, VIQUEQUE

Funsionáriu 103 Viqueque hahú presta deklarasaun rikusoin ba CAC

Funsionáriu 103 Viqueque hahú presta deklarasaun rikusoin ba CAC

Funsionáriu CAC rejista dokumentu deklarasaun rikusoin funsionáriu no kargu xefia Viqueque, iha salaun administrasaun munisipál, tersa (04/10). Imajen Tatoli/Vitorino Lopes da Costa

VIQUEQUE, 04 outubru 2022 (TATOLI)--Funsionáriu 103 iha munisípiu Viqueque hahú presta deklarasaun rikusoin ba Komisaun Antí-Korrupsaun (CAC, sigla portugés).

“Ohin ami hahú rejista funsionáriu no kargu xefia hamutuk 103 iha munisípiu Viqueque hodi presta deklarasaun rikusoin, ne’e obrigatóriu,” Diretór Asuntu Inspesaun monitorizasaun CAC, Tonino Alves da Costa, hateten iha salaun administrasaun munisipál, tersa ne’e.

Presta deklarasaun rendimentu bens no interese iha munisípiu Viqueque ho karatér obrigatóriu haktuir iha artigu 29 númeru 07/2022 26 agostu, kona-ba atu hato’o loloos rikusoin indivíduu bainhira asume kargu xefia sira iha administrasaun públika nian.

“Tanba ne’e ami ajuda funsionáriu kargu xefia sira hodi prienxe ba formuláriu liuhosi sistema eletróniku (online) ne’ebé Komisaun Antí-Korrupsaun dezeña ona,” nia akresenta.

Notísia relevante: CAC halo adverténsia ba kargu xefia 300 relasiona deklarasaun rikusoin

Entidade hirak ne’ebé sujeita ba deklarasaun kompostu hosi administradór munisípiu, administradór postu, diretór, xefe departamentu, funsionáriu servisu terra no propriedade, funsionáriu aprozionamentu no polísia investigasaun kriminál.

Rekezitu ba presta deklarasaun maka hanesan kartaun eleitora hosi fen no lae, sertidaun oan sira, dokumentu rai, dokumentu transporte, konta bankária fen laen no oan sira, dokumentu investimentu rai-laran no rai-li’ur, no dokumentu kompañia.

“Ami-nia alvu presta deklarasaun nasionál sei hotu loron 31 dezembru 2022, maibé ba munisípiu Viqueque sei realiza durante loron-30, hahú iha loron 03 outubru no sei termina iha loron 03 novembru 2022,” nia tenik.

Nia dehan, funsionáriu sira bainhira la presta deklarasaun rikusoin tuir prazu maka sei aplika koima.

“Bainhira funsionáriu sira la presta deklarasaun tuir prazu ne’ebé ita termina maka tarde liu sei aplika koima 25% hosi saláriu mensál. Bainhira sira la aprezenta, ita dehan katak falta aprezentasaun sei ko’a saláriu hosi 30% saláriu mensál. Tanba ne’e obrigatóriu tenke prienxe,” nia aprezenta.

Nune’e, ekipa CAC sei apoiu funsionáriu no kargu xefia sira iha munisípiu Viqueque hodi presta deklaraaun.

“Ami husu kargu xefia sira hakbesik-an ba ami, bainhira iha difikuldade ruma bele informa hodi konsulta, nune’e bele presta deklarasaun rikusoin,” nia dehan.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!