DILI, 04 outubru 2022 (TATOLI)—Diretór Nasionál Mission Aviation Fellowship (MAF), Nick Hitching, hateten, operasaun voo doméstiku ne’ebé implemeta hosi MAF no Governu Timor-Leste iha fulan-abril to’o agora konsege transporta ona pasajeiru 1.400 ho rute Dili-Ataúro.
“Voo doméstiku nu’udar alternativu ida hodi ajuda populasaun no turista sira bá mai Ataúro Dili, bainhira ró ne’ebé halo movimentu Dili Ataúro hasoru problema ruma. Desde iha lansamentu voo doméstiku, to’o semana kotuk konsege transporta ona pasajeiru entre Dili no Ataúro hamutuk 1.400, ne’ebé pasajeiru sira ne’e maihosi estranjeiru no populasaun lokál Ataúro,” Nick Hitching informa ba Agência Tatoli, iha Aeroporto Prezidente Nicolau Lobato, Comoro, tersa ne’e.
Notísia relevante: Empreza hosi Singapura hakarak investe iha setór aéreu
Pasajeiru sira ne’e kompostu hosi estranjeiru 70% no populasaun lokál 40%, enkuantu kona-ba presu billete diferente, ba estranjeiru kada viajen ho kustu $70 ba komunidade lokál $30.
Operasaun voo semana ida dala-tolu maibé bainhira iha númeru pasajeiru barak, MAF halo mudansa semo dala-rua iha loron ida.
“Aleinde tula pasajeiru estranjeiru, iha mós Organizasaun Naun Governamentál sira ne’ebé halo viajen ho voo doméstiku hodi realiza atividade, ida-ne’e ita fasilita pasajeiru sira fó kontribuisaun ba ekonomia Ataúro nian,” nia tenik.
Jornalista : Arminda Fonseca
Editora : Julia Chatarina
