iklan

NASIONÁL, KAPITÁL

Produsaun xápa matrikula orijinál sei iha prosesu konkursu

Produsaun xápa matrikula orijinál sei iha prosesu konkursu

Xapa Matríkula Orijinál. Imajen/Natalino Costa.

DILI, 04 outubru 2022 (TATOLI)-Xefe Departamentu Rejistu Veikulu iha Dirasaun Nasionál Transporte no Terrestre (DNTT), Amandiu do Rosário informa katak prosesu produsaun xápa matrikula orijinál ba motorista no karreta sira sei iha prosesu konkursu públiku aprovizionamentu iha Ministériu Transporte no Komunikasaun (MTK).

Notísia relevante :Setembru-outubru: DNTT sei distribui xápa matrikula orijinál

“Xápa matrikula, STNK blanku no karta kondusaun, tolu ne’e la’o hamutuk, agora dadaun sei iha prosesu tenderizasaun aprovizionamentu iha MTK. Dadaun ne’e xápa matrikula seidauk mai DNTT, tanba DNTT atu fahe de’it, entaun kompañia ne’ebé manan fornese ona xápa matrikula mai, DNTT prontu fahe de’it, tanba ami fó ona invoice provizóriu. Agora imi haree xápa matrikula karreta no motor ami asina ona surat-tahan, entaun sira lori ne’e mai sira bele foti ona sira-nia direitu, tanba sira selu ona. Ne’ebé, hein ita-nia xápa matrikula sira ne’e to’o ona mai Diresaun Transporte Terrestre, ami fó sai avizu ida-idak mai foti nian xápa matrikula, ida ne’e ba karreta no motor hotu,” Amandiu do Rosário, hateten ba jornalista sira, iha nia knaar fatin, Balide, Díli, tersa ne’e.

Tuir nia, karreta sira ho xápa matrikula hahú hosi A240001 to’o A290001 no motor hahú hosi P6.001 (P, rihun neen ida) to’o S sei iha prosesu laran.”Ida ne’e xápa matrikula sei uza hela surat-tahan, maibé komunidade selu ona taxa, ne’ebé xápa matrikula sira ne’e sei la’o hela iha prosesu,” nia esplika.

Maske nune’e, nia akresenta, DNTT haree iha tinan ne’e labele fornese xápa matrikula orijinál ba motorista no karreta sira, tanba tinan ne’e hela fulan rua.

“Ita haree iha tinan ne’e hela de’it fulan hira no prosesu la’o hela hanesan ne’e, maibé DNTT diresaun ne’ebé tékniku ezekuta de’it, tanba prosesu atu la’o oinsa Diresaun Aprosionamentu MTK mak tenke responsabilidade ida ne’e,” Xefe ne’e dehan.

Entretantu, tuir informasaun hosi Xefe Departamentu Rejistu Veikulu iha Dirasaun Nasionál Transporte no Terrestre (DNTT), Amandiu do Rosário, katak xápa matrikula ba transporte públiku ki’ik no boot, kada ida ho totál $15 dolár, motor $12.50 sentavu. Enkuantu, STNK ba transporte hotu hamutuk $10 dolár.

Jornalista : Nelia Fernandes
Editór : Rafy Belo

 

iklan
iklan

Leave a Reply

iklan
error: Content is protected !!