DILI, 06 outubru 2022 (TATOLI)—Tribunál Distritál Dili, (TDD), kinta ne’e (06/10), kontinua halo julgamentu ba kazu partisipasaun ekonómika, ho arguidu eis Ministru Komérsiu, Indústria no Ambiente (MCIA, sigla portugés), António da Conceição “Kalohan”.
Ministériu Públiku (MP) akuza arguidu António da Costa ho krime pekulatu, previstu iha artigu 295. Julmira Inacia Belo, Gaspar Policarpo da Silva Correa, António da Conceição, ho krime partisipasaun ekonómika iha negosiu, no administrasaun danoza iha artigu 299 no 274 husi kódigu penál Timor-nian.
Notísia relevante: MP alega eis-ministru António Kalohan ho pena prizaun tinan lima
Nune’e, perante julgamentu kontinuasaun ne’e, advogadu Pedro Camões nu’udar defeza hosi arguidu atuál deputadu Parlamentu Nasionál (PN), António da Conceição, husu TDD absolve arguidu hosi krime ne’ebé MP imputa ba.
Razaun defeza husu absolve tanba MP nian akuzasaun katak ho aprovasaun CPV ne’e arguidu “Kalohan” mak hamosu prezuiju ba Estadu. Maibé arguidu aprova de’it. Diretór sira mak prosesu no tékniku sira mak hala’o prosesu konkursu no seluk. Tanba ne’e, defezea nia entendimentu laiha danu administrasaun tanba arguidu asina de’it, hotu ona.
Alende ne’e, advogadu ne’e dehan iha mós realidade seluk ne’ebé MP la lori prova, hafoin asina CPV arguidu “Kalohan” hetan benefísiu ruma ou fó vantajen ruma ba ema seluk ka sira hotu ida ne’e laiha prova.
“Entaun, se asina de’it ne’e tanba nia kna’ar, agora lei dehan hetan prezuiju ba Estadu. Maibé, Ministériu Públiku la buka, se fó vantajen ba ema ruma, se faktu ida ne’e laiha mak dalan di’ak liu absolve”, advogadu privadu hateten ba jornalista hafoin halo alegasaun iha sala TDD, kinta ne’e.
Nia dehan iha fulan-agostu 2015, arguidu Kalohan muda, assume kargu Ministru Edukasaun (ME) no kargu ne’e ema seluk mak mai ministru, nune’e nia labele halo administrasaun ba fatin ne’ebé la okupa.
Nune’e, defeza fiar katak akuzasaun hosi MP ne’e laiha prova inklui diretór sira hotu, tanba diretór aprovizionamentu no sira seluk asina tiha hotu no iha mundansa kedan ne’ebé durante fulan neen la serbisu ona.
Notísia relevante: TDD rona sasin ba kazu António Conceição
Iha biban hanesan, defeza husi arguida Julmira Inacia Belo, Manuel Sarmento husu mós ba juis koletivu Maria Solana, Ana Paula no Ivan Suritai atu absolve arguidu nain-tolu husi krime ne’ebé Ministeriu Públiku imputa ba sira tanba produsaun prova sira no sasin sira deklara iha tribunál la komprova katak arguidu sira komete krime ne’ebé MP imputa ba sira.
Arguida hanesan diretora armazenamentu iha MCIA, iha dever no funsaun tuir lei atribui ba nia no iha obrigasaun tenke haree ekipamentu sira ne’ebé maka MCIA hola momentu ne’ebá.
“Ha’u husu ba tribunál atu absolve krime partisipasaun ekonómika iha negosiu no administrazasau danoza ne’ebé Ministériu Públiku imputa ba ha’u nia kliente, no husu tribunál atu tetu didi’ak pena ne’ebé maka antes MP aprezenta iha alegasaun hasoru nia kliente,” nia afirma.
Nune’e mós defeza husi arguidu Gaspar Poli Garpo Correia, advogadu privadu José da Silva mós husu ba juis sira atu absolve nia kliente husi krime partisipasaun ekonómika iha negosiu no krime administrasaun danoza, ne’ebé MP alega ba arguidu. Tanba, iha produsaun provas la hatudu nia kliente komete krimi refere.
“Ha’u nia kliente halo serbisu tuir de’it kontratu, sasan sira ne’ebé maka kompañia hatama mai kompletu no ha’u nia kliente la uza sasan sira ne’e ba nia interese privadu, tanba ne’e ha’u husu absolve arguidu husi krime ne’e,” nia afirma.
Defeza husi arguidu Paul Manuel da Costa Soares Viana, advogadu privadu Cancio Freitas, husu mós ba tribunál atu absolve nia kliente husi krime burla agravadu, administrasaun danoza, no falsifikasaun dokumentu.
Arguidu Paul Manuel da Costa Soares Viana nu’udar diretór kompañia Kninuk Star Unipesoal Lda momentu hetan kontrata husi MCIA atu hola mákina produsaun masin 2014.
“Ha’u nia kliente halo tuir de’it kontratu ne’ebé nia kompañia selebra ho MCIA momentu ne’eba. Ho nune’e sasan sira ne’ebé maka iha kontratu ne’e tama duni tuir item ne’ebé maka iha kontratu laran, maibé iha balun maka atraza,” katak.
Tribunál Distritál Dili halo ona inspensaun ba edifisiu MCIA Matadoro haree sasan sira ne’e iha duni, balun mak kompañia importa tarde, maibé sasan sira iha duni tuir item ne’ebé iha kontratu laran.
“Ha’u hanoin kompañia halo serbisu tuir kontratu ne’ebé ministériu fó ba nia no sasan sira iha duni, tanba ne’e ha’u husu tribunál absolve ha’u nia kliente husi krime ne’ebé Ministériu Públiku imputa ba nia,” nia sujere.
Hafoin rona tiha parte defeza tribunál deside adia fila-fali julgamentu ne’e ba loron 04 novembru 2022, iha tuku 4:00 lokra’ik hodi rona leitura desizaun finál.
Notísia relevante: Deputadu ‘Kalohan’-funsionáriu MKIA submete ba julgamentu
Jornalista: Natalino Costa/ Nelson Sousa
Editór : Florencio Miranda Ximenes
