Família ida iha Polo Bobonaro moris ho kondisaun defisiénsia
BOBONARO, 07 outubru 2022 (TATOLI) – Sentru Solidariedade Sosiál Munisípiu Bobonaro, identifika família ida iha aldeia Polo, suku Kolimau, postu administrativu Bobonaro, munisípiu Bobonaro, moris ho kondisaun defisiente grave hotu kedas.
Diretór Sentru Solidariedade Sosiál Munisípiu Bobonaro, Francisco Tilman, informa, kondisaun moris família ne’e ekipa idntifika bainhira hala’o atividade vizita suku liuhosi programa bein-estar komunidade ne’ebé realiza iha fulan kotuk.
Notísia relevante: MSSI sei lori sidadaun moras mentál ida hosi Maliana ba tratamentu iha Laklubar
“Família ida iha aldeia Polo ne’e inan-aman ho oan ne’e moris ho kondisaun defisiénsia hotu no la eskola hotu, ne’ebé laiha ema ruma mak atu tau matan, sira-ne’e atu buka hahhan ruma ne’e dolar de’it, maibé sira dezaaraska no lakohi depende ba ema, ita haree sira-nia kondisaun labele duni,” nia informa ba Tatoli, iha Maliana.
Tilman haktuir, alende kondisaun fíziku,uma ne’ebé sira hela ba iha liu foho Ramelau nia hún ho kondisaun la dignu hotu ona inklui la asesu liña eletrisidade.
Maibé provizóriu seidauk bele aprezenta dadus kompleta ba problema ne’ebé família ne’e enfrenta tanba ekipa sira sei kontinua rekolla informasaun iha terrenu.
“Iha tempu badak ami sei ba haree fila-fali, lori netik ai-haan ruma ba entrega ba sira atubele hatutan netik sira-nia moris iha loron balun, depois mak ita rekolla fali dadus kompletu aprezenta ba governu, tanba sira-nia moris grave duni,” nia katak.
Diretór ne’e dehan, liuhosi programa vizita suku ne’e mos konsege identifika komunidade munisípiu Bobonaro hamutuk 200-resin mak moris ho kondisaun grave ho estatutu defisiénsia fízika, mental no moras kronika.
Nune’e mós balun moris ho kondisaun grave iha aspetu sósiu-ekonómiku, abandona hosi la’en-kaben inklui balun atu haan loron ida de’it mós viziñu mak sei fó apoiu foos lata ida ka rua hodi sustenta moris.
“Balu idozu mais laiha oan sira maka tau-matan, moris mesak iha uma, depois uma mos aat ona, hanesan iha Lour, Sibuni, Ai-asa, Kolimau, Mali-Ubu, Ilat-Laun, Marobo. Sira ne’e parte postu Bobonaro, depois parte Lolotoe nian maka suku Gildapíl no Lebos,” nia akresenta.
Responsável sentru solidariedade sosiál ne’e informa, problema ne’ebé abitante sira hasoru ekipa sira sei rekolla dadus hafoin submete ba Ministériu Solidariedade Sosiál no Inkluzaun (MSSI) no ministériu sira seluk atu belehetan apoia.
“Konforme sira dehan ba ha’u, ami-nia naran, uma ne’e ema foto ba foto, lori ami-nia foto kopia eleitorál dehan ami atu hetan kalen, hetan besi, maibé to’o ohin loron la hetan, balu fó tán sasán ba ema-ne’ebé hasai foto ne’e,” nia haktuir.
Diretór Sentru Solidariedade Sosiál Munisípiu Bobonaro, Francisco Tilman seidauk bele fó-sai identidade hosi família ida iha aldeia Polo ne’e tanba oras ne’e tékniku sira rekolla hela informasaun.
Munisípiu Bobonaro iha aldeia 193, suku 50, postu administrativu neen ho totál populasaun 114,537, komposta hosi mane 57,462, feto 57,075 ho totál uma-kain 24,591.
Notísia relevante: MSSI aprova benefisiáriu Bolsa da Mãe Jerasaun foun na’in-632 iha Bobonaro
Jornalista : Sérgio da Cruz
Editór : Evaristo Soares Martins
