BOBONARO, 07 outubru 2022 (TATOLI) – Xefe família balun hosi 1,900 hosi suku Holsa, postu administrativu Maliana, munisípiu Bobonaro, naran la tama iha lista atu hetan subsídiu $200 ne’ebé tuir planu sei lansa iha fulan-novembru nia laran.
Xefe suku Holsa, António Santa Cruz, fó-sai katak, bazea ba lista anteriór kandidatu asesu subsídiu tinan nia rohan (fim do ano) $200 iha suku Holsa, hamutuk uma-kain 1,900 maibé balun naran laiha lista ne’ebé Governu fó atu halo verifikasaun.
Notísia relevante: Governu deside uma-kain hotu simu subsídiu $200
“Ha’u-nia suku loloos ne’e xefe família hamutuk 1,900, ne’ebé rejista hahú 2021 mai to’o 28 fevereiru 2022, maibé lista ne’ebé fó fila hosi nasionál mai, kandidatu balun naran la mai fali iha lista ne’e,” nia informa ba jornalista sira, iha Maliana, sesta ne’e.
Kona-ba xefe família na’in hira mak naran la mai, Santa Cruz dehan dadus ne’ebé hosi ministériu implementadór fó ba suku halo verifikasaun ho prazu loron tolu de’it nune’e seidauk bele hatene loloos.
Nia haktuir, iha momentu verifikasaun lista komunidade barak mak la atualiza sira-nia naran ne’ebé governu haruka mai, maibé balun hafoin submete tiha lista ba nasionál to’o ikus verifika iha xefe família balu naran laiha.
“Ita-nia benefisiáriu balun la’ós de’it moris hanesan agrikultór, maibé sira mós moris hanesan fila-liman, halo negósiu entaun sira la hela hakmatek iha sira-nia suku, ne’e duni tempu de’it loron tolu la sufisiente ba ami atu fahe informasaun ba komunidade sira sai benefisiáriu,” nia hatutan.
Santa Cruz husu ba Governu atu fó esplikasaun klara tanba saida mak uma-kain ne’ebé rejista ona iha fixa família dezde 2021 maibé naran laiha nafatin.
“Ami presiza hatene lakon ne’e iha-ne’ebé, atu ami hatene ita-nia benefisiáriu sira, sé dadus ne’e maka mai nafatin hanesan sira fó ami ne’e, entaun ami hakarak hatene katak, ami-nia komunidade lubuk ida mak la hetan subsídiu ne’e,” Xefe suku ne’e akresenta.
“Sira-ne’ebé rejista depois 28 fevereiru 2022 Governu la konsidera, hanesan autoridade lokál ha’u sente tristes tebes, tanba ita-nia komunidade sira-ne’e la hetan rekoñesimentu hosi estadu ida-ne’e,” António afirma.
Maibé, bazea ba dekretu-lei númeru 37/2022, loron 25 maiu, artigu 2 esplika, benefisiáriu sira ba subsídiu ne’e hanesan uma-kain sira-ne’ebé rejistadu ona iha livru rejistu uma-kain iha suku, iha territóriu nasionál tuir termu previstu iha diploma ministeriál númeru 49/2017, 23 agostu.
Iha dekretu ne’e, konsidera hirak-ne’ebé rejistadu ona iha livru rejistu uma-kain iha suku to’o loron 28 fulan-fevereiru tinan 2022.
“Ami-nia rekomendasaun maka husu nafatin ba iha Governu atu fó tempu oinsá atu ami bele submete dadus ne’e hanesan dadus reklamasaun ida oinsá Governu bele haree, hodi sira bele hetan hotu direitu,” xefe suku Holsa ne’e sujere.
Notísia relevante: Dadus benefisiáriu subsídiu $200 iha Bobonaro sei aprezenta iha outubru
Jornalista : Sérgio da Cruz
Editór : Evaristo Soares Martins
