OÉ-CUSSE, 08 outubru 2022 (TATOLI)–Prezidente Autoridade Rejiaun Administrativa Espesiál Oé-cusse Ambeno (RAEOA), Arsénio Paixão Bano, informa, tinan ne’e sei harii Sentru Formasaun ba profesór atu hasa’e koñesimentu no kapasidade hodi kualifika prosesu ensinu aprendizajén iha rejiaun ne’e.
“Prosesu konkursu anúnsia ona, agora iha faze konkursu públiku, ita hein katak iha tempu badak ita rona ona rezultadu sé mak manán atu hahú halo konstrusaun, tanba RAEOA rasik halo Sentru Formasaun ba profesór atu hasa’e koñesimentu espesiál ba manorin sira tanba planu fasilidade ba sentru ne’e, sala ida sei instala espesiál ba informátika ninian,” Prezidente Autoridade RAEOA informa iha ámbitu serimónia grasaun UNTL, iha otél Ambeno Oé-cusse, iha sesta (07/10).
Notísia relevante: Profesór kontratadu 182 hosi RAEOA gradua ho títulu baxarelatu
Tuir nia, razaun instala informátika tanba teknologia iha nível mundiál avansadu ona, entaun profesór sira tenke iha koñesimentu. Nune’e iha futuru bele fasilita prosesu aprendizajen liuhosi telekonferénsia.
“Ita harii Sentru Formasaun ne’e sentrál no pakotementu, iha sala biblioteka, komputadór, fatin ba profesór sira no fatin ba formasaun,” nia akresenta.
RAEOA iha tempu badak hahú ona konstrusaun ba sentru, tanba tinan ne’e profesór kontratu iha RAEOA na’in-182 mak ramata ona kursu baxarelatu espesiál iha Fakuldade Edukasaun Arte no Umanidade.
“Ne’e hanesan faze dahuluk, maibé ba faze daruak iha tinan 2023. Daudaun ne’e Autoridade RAEOA liuhosi Sekretária Rejionál ba Asuntu Edukasaun no Solidariedade Sosiál rejista ona profesór na’in-116 atu prepara tuir formasaun iha tinan oin. Iha faze dahuluk ne’e 182 enfrenta problema iha fasilidade mínimu, maibé tinan oin iha ona profesór 116 tuir tan formasaun iha baxarelatu, ne’ebé sei iha fasilidade di’ak liután tanba ita sei harii Sentru Formasaun ida-ne’e atu fasilita sira,” nia tenik.
Notísia relevante: MESSK husu profesór sira asegura edukasaun ho kualidade
Prezidente Autoridade RAEOA fundamenta, Sentru Formasaun ne’e aban bairua bele sai embriaun institutu formasaun ne’ebé la’ós de’it ba profesór sira, maibé bele mós ba funsionáriu hotu.
Maski nune’e, sei iha diskusaun entre parte Autoridade RAEOA no Ministériu Ensinu Superiór Siénsia no Kultura (MESSK), karik permite RAEOA atu loke ensinu superiór ka universidade ida ba área espesializada ida.
“Sira-ne’ebé lakoi tanba iha balun dehan tuir tiha ona formasaun iha nível lisensiatura ona maibé nusa mak la tama iha sistema karreira? entaun tuir tiha lai tinan-tolu, tanba ne’e regulamentu Ministériu Edukasaun polítika nasionál, RAEOA só administra de’it, tanba ne’e RAEOA hakarak profesór sira hotu la’ós iha étika profisionál no matenek maibé tenki iha mós patriota no nasionalizmu tanba ema rihun ba rihun mate ba rai ida-ne’e, atu ita loron ida sai matenek atu kontinua lori nasaun ba futuru no maneja rasik bele han dadeer meiudia no kalan,” nia katak.
Dokumentu konkursu públiku ne’e anúnsia ba públiku iha loron 15 setembru no enserra iha 27 setembru 2022, ho nú.Ref, RFQ: RAEOA-ZEESM TL SRF/UAL/2022-012.
Jornalista : Abílio Elo Nini
Editora : Julia Chatarina
