DILI, 10 outubru 2022 (TATOLI)–Ministru Edukasaun Juventude no Desportu (MEJD), Armindo Maia, deklara sei fó atensaun sériu ba Eskola Ensinu Báziku Filiál (EBF) Poerema tanba daudaun ho kondisaun grave no menus profesór.
Eskola ne’e lokaliza iha aldeia Leobote, suku Meligu, postu administrativu Cailaco, munisípiu Bobonaro.
“Ha’u sei fó atensaun sériu ba eskola ne’e tanba kondisaun ladi’ak, eskola ne’e didin de’it ho ahu no odamatan halo de’it ho kalen,” Ministru hato’o asuntu ne’e hafoin audiénsia públika ho Komisaun G ne’ebé trata asuntu edukasaun, kultura, juventude, desportu no sidadania, iha resintu Parlamentu Nasionál, segunda ne’e.
Notísia relevante: MEJD prevee millaun $122 ba programa prioridade tolu iha tinan 2023
Tuir nia, Governu liuhosi ministériu iha intensaun atu apoiu eskola sira iha área remota inklui eskola hanesan Poerema ne’e rasik, maibé presiza haree mós ninia kondisaun tanba difísil ba ministériu atu koloka profesór sira.
“Tanba ne’e, presiza hadi’a situasaun no kondisaun eskola Poerema ne’ebé estudante no profesór sura enfrenta, depois maka ministériu sei fó apoiu atu nune’e bainhira iha kolokasaun profesór ba eskola ne’e bele iha ona kondisaun adekuadu,” nia akresenta.
Eskola ne’e rasik iha de’it profesór rua ne’ebé durante ne’e hanorin hela estudante 40, ne’ebé profesór ida permanente no ida voluntáriu. Eskola ne’e akumula estudante primeiru no segundu siklu hosi primeiru to’o kuartu ano.
Jornalista : Tomé Amado
Editora : Julia Chatarina
