DILI, 10 outubru 2022 (TATOLI)–Ministériu Edukasaun Juventude no Desportu (MEJD) hamutuk ho Komisaun G ne’ebé trata asuntu edukasaun, kultura, juventude, desportu no sidadania, segunda ne’e, halo audiénsia públika hodi diskute kona-ba alokasaun orsamentu tinan 2023 ho montante $122.249.822.
MEJD iha prioridade tolu ba tinan oin hanesan programa boa governasaun no jestaun institusionál, edukasaun no formasaun no igualdade jéneru no inkluzaun sosiál.
“Ita mai hasoru malu ho Komisaun G Parlamentu atu relata kona-ba progresu serbisu tinan 2022 inklui aprezenta planu Orsamentu Jerál Estadu 2023 ba deputadu sira,” Ministru Edukasaun Juventude no Desportu, Armindo Maia, hateten hafoin remata audiénsia públika ho komisaun, segunda ne’e.
Notísia relevante: MEJD sei kontrata profesór voluntária 2.111
Ezekusaun ministériu ne’ebé iha progresu balun mak hanesan rekrutamentu profesór voluntáriu ne’ebé hein atu tama ba faze finál no progresu seluk kona-ba infraestrutura edukativa inklui projetu komunitáriu no kapitál dezenvolvimentu.
“Maski progresu projetu komunitáriu la’o neineik maibé ninia progresu pozitivu, signifika projetu komunitáriu agora la’o daudaun hela iha territóriu nasionál,” nia tenik.
Programa seluk kona-ba formasaun pro-portugés ne’ebé tuir planu atu atinje to’o profesór 4.000 iha territóriu nasionál.
Aleinde ne’e, MEJD informa kona-ba orsamentu retifikativu inklui ezekusaun orsamentu ba liña internet no bolsa ba mellór estudante
Iha biban hanesan, Prezidente Komisaun G Parlamentu Nasionál, António Verdial, relata katak audiénsia ne’e atu ajusta de’it hanoin ruma kona-ba montante orsamentu ne’ebé ministériu presiza, karik orsamentu sira boot liu fali kapasidade ezekusaun, komisaun iha direitu atu muda filafali ba item seluk ne’ebé presiza.
“Orsamentu MEJD nian laiha problema tanba orsamentu ne’ebé aloka ba programa prioridade tolu iha ona diskusaun no sira deside tuir nesesidade ministériu,” nia tenik.
Jornalista : Tome Amado
Editora : Julia Chatarina
