BOBONARO, 11 Outubru 2022 (TATOLI) — Governu liuhosi Sekretáriu Estadu Asuntu Kombatente Libertasaun Nasionál (SEAKLN), Júlio da Conceição ‘Loro Mesak’, segunda ne’e, ensera verifikasaun baze dadus etapa daruak ba kombatente libertasaun nasionál ne’ebé rejistadu iha tinan 2009 hamutuk na’in-12.815 iha munisípiu Bobonaro.
Tuir dadus hosi Konsellu Kombatente Linertasaun Nasionál (CCLN) munisípiu Bobonaro, iha kombatente na’in-12,815 mai hosi postu administrativu Atabae iha na’in-1.319 hosi totál válida ona 1.152, seidauk válida 124 no pendente 16.
Notísia relevante: Novembru, MACLN sei halo validasaun ikus ba dadus veteranu rejistadu 2009
Hosi postu administrativu Balibo iha kombatente na’in-1,012, válida ona 845, seidauk válida 151 no repetidu 16, hosi postu administrativu Lolotoe iha na’in-2.083, válida ona 1.541, seidauk válida na’in-90.
Hosi parte postu administrativu Bobonaro hosi suku 18, hamutuk kombatente na’in-4,602, válida 3.872 no seidauk válida 900 inklui pendente no eskluidu na’in-lima.
Enkuantu iha postu administrativu Cailaco iha kombatente na’in-1.012, válida ona 1,076, seidauk válida 582, repetidu 18. Iha postu administrativu Maliana suku hotu totál kombatente na’in-2.025, válida ona 1.345, seidauk válida 635 no repetidu 43.
Sekretáriu Estadu Asuntu Kombatente Libertasaun Nasionál, Júlio da Conseição ‘Loro-Mesak’ hateten, ekipa ne’ebé verifika dadus hirak-ne’e maioria Bobonaro-oan, ne’ebé uluk komanda funu, tanba ne’e deklarasaun istória kontribuisaun ba luta mak sei determina kandidatu futuru atu hetan direitu ba pensaun.
“Ohin, ita termina ona dadus rejistu 2009 nian iha munisípiu Bobonaro, dadus sira-ne’e lori ba nasionál hodi deside. Ha’u fiar katak dadus 2009 imi sei hatete buat loos, Laiha ema ida atu deside ita-boot sira-nia futuru, tanba futuru iha ita-boot sira-nia liman rasik, istória imi mak hato’o rasik, laiha ema ida maka ba ko’alia netik iha imi-nia fatin,” governante ne’e hateten iha Maliana.
Loro-Mesak akresenta, tuir planu ne’ebé trasa ona, iha fulan-novembru sei konvida komisaun verifikasaun munisípiu Bobonaro, sekretariu zona sira, komandante rejiaun, asistente polítiku sira atu ba Dili hodi deside kandidatu sé mak bele pasa ka lae.
Prosesu verifikasaun sei falta munisípiu Ermera no Baucau, maibé planu VIII governu konstituisionál lideradu Primeiru Ministru, Jenerál Taur Matan Ruak, hakarak termina dadus verifikasaun iha tinan ida-ne’e ne’e.
“Ita-nia situasaun mak ne’e, ita tenke simu, maibé governu agora hakarak ka lakohi termina agora, kuandu bolu ona responsável sira tún ba, ami ko’alia hamutuk ona, deside hamutuk ona, ita haruka lista sira mai munisípiu taka fila fali, ita prosesa kedas, sei la dada naruk tán,” nia katak.
Ministru Ensinu Superiór, Siénsia no Kultura, Longuinhos dos Santos, orgullu tanba bele partisipa iha serimónia ne’e.
“Ida-ne’e signifika katak, atubele organiza no mobiliza di’ak liután atu veteranu sira apoia iha konstrusaun estadu, no apoiu halo dezaminasaun ba Governu nia programa, liuliu iha munisípiu Bobonaro nian,” nia dehan.
Prezidente Komisaun Verifikasaun Munisípiu Bobonaro, Jacinto Viegas Viçente ‘Roque’, esplika, hosi totál kombatente na’in-12,815 ne’e konsege verifika ona 9.000-resin no sei falta rihun rua-resin.
“Dadus sira-ne’ebé verifika, ami hein orientasaun oinsá ita atu kontinua, tanba ami sempre hasoru kombatente sira rejistadu iha 2013 no 2005, liuliu sira 4 a 7 sira, ezije dehan bainhira halo verifikasaun no sira-ne’ebé seidauk rejistu,” nia dehan.
Veteranu Roque agradese ba autoridade seguransa hanesan PNTL no F-FDTL ne’ebé mak durante ne’e fó apoia seguransa másimu ba ekipa verifikasaun to’o remata ho susesu.
Partisipa iha serimónia enseramentu ne’e, Vise-Prezidente Konsellu Kombatente Libertasaun Nasionál Marito Reis, reprezentante komisaun Verifikasaun nasionál, komandante PNTL munisípiu Bobonaro, Superintendente Antóninho Mauluta.
Nune’e mós administradór postu, repezentante sekretáriu zona sira, Nurep, asistente polítiku, veteran sira, autoridade lokál no komunidade hosi munisípiu Bobonaro.
Notísia relevante: Verifikasaun dadus veteranu rejistadu 2009 atinje ona 78%
Jornalista : Sérgio da Cruz
Editór : Evaristo Soares Martins
