iklan

EKONOMIA, BOBONARO, HEADLINE, MUNISÍPIU

SERVE atribui ona lisensa komersiál ba kioske 26 iha Lolotoe

SERVE atribui ona lisensa komersiál ba kioske 26 iha Lolotoe

Koordenadór Interinu SERVE,I.P Sukursál Munisípiu Bobonaro, Leopoldo Perreira Fernandes. Imajen Tatoli/Sérgio da Cruz.

BOBONARO, 11 outubru 2022 (TATOLI) — Servisu Rejistu no Verifikasaun Emprezariál, Institutu Públiku (SERVE, I.P) sukursál munisípiu Bobonaro, atribui ona sertifikadu lisensa komersiál ba kioske hamutuk 26 iha postu administrativu Lolotoe.

Koordenadór SERVE,I.P sukursál munisípiu Bobonaro, Leopoldo Perreira Fernandes, informa, instituisaun ne’e konsege rekolla dadus hamutuk 50 liuhosi atividade rejistu movél kobre suku hitu iha postu administrativu Lolotoe, inklui suku Molop, postu administrativu Bobonaro tanba distánsia besik maluk hela.

Notísia relevante: Programa rejistrasaun movél, SERVE alista empreza 52 iha Bobonaro

Hosi númeru ne’e iha dukumentu rua de’it mak rejista hanesan empreza unipesoál Lda no restante ema nome individuál.

“Iha semana kotok, ita ba fali halo distribuisaun sira-nia dokumentu hamutuk 26. Sira-ne’e maioria loke no fa’an sasán fa’an rahun, bainbain ne’e sira-nia atividade la’o tiha ona, maibé sira seidauk hetan lisensa hosi SERVE, entaun ita ba formaliza fali sira-nia atividade liuhosi lisensa ne’ebé fó ba sira,” nia informa ba Tatoli, tersa ne’e

Leopoldo subliña, iha empreza 24 mak dokumentu seidauk kompletu hanesan Billete Identidade (BI) laiha no balun liu ona prazu.

Maibe hirak-ne’e SERVE nafatin rejista, tanba sei iha oportunidade fó prazu ba sira fulan tolu hamutuk loron 90 atu prepara dokumentu, maske nune’e dentru loron determinadu ne’e mak sira la konsege submete fila-fali mai mak sei kansela ona dukumentu atu hetan lisensa atividade.

“Ha’u husu ba negosiante sira iha Lolotoe no Bobonaro laran tomak, ami enkoraja ita-boot sira di’akliu hala’o ita-nia atividade tenke iha lisensa komersiál hosi SERVE, tanba lisensa ne’ebé ita fó hanesan xave ida atu loke dalan ba ita atu asesu kréditu ne’e,” nia fó hanoin.

Enkuantu totál funsionáriu iha SERVE Munisípiu Bobonaro durante ne’e halo atendimemtu ba empreza sira-nia dokumentu hamutuk na’in-12 maioria funsionáriu kontratadu.

Notísia relevante: SERVE Bobonaro rekolla reseita rihun $5-resin

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!