DILI,12 outubru 2022 (TATOLI)—Diretora Servisu Saúde Munisípiu Dili, Agostinha Segurad, informa iha semana dahuluk fulan-outubru 2022, fasilidade saúde rejista kazu dengue neen.
“Iha inisiu fulan-outubru nia laran ne’e, ita rejista kazu dengue neen, hosi postu administrativu Dom-Aleixo na’in haat, no Cristo Rei iha na’in-rua,” hateten Diretora ne’e ba Agência TATOLI via rede sosiál, kuarta ne’e.
Notísia relevante: Médiku Espesialista hosi Reinu Unidu promete apoia MS hodi kombate dengue
Tuir nian, kazu dengue neen afeta ba labarik idade tinan lima mai kraik, tanba ne’e husu ba inan aman sira kuidadu labarik no hamoos uma ninin, vazu ai-funan sira tenke troka bee semana semana tanba udan hahú monu rai.
“Kazu neen ne’e kamaan, maibé ita nia ekipa sira rega ona uma-kain tolu no uma kain tolu seluk seidauk tanba ekipa sira kontaktu la hetan, nune’e koordena ona Xefe suku no xefe aldeia mós sira la hatene,” akresenta.
Tanba ne’e, nia husu ba familia sira karik iha kazu hanesan ne’e tenke koordena ho ekipa saúde, nune’e bele halo intervesaun lalais.
Tuir dadus hahú hosi janeiru to’o setembru 2022, Munisípiu Dili nafatin rejista kazu dengue hamutuk 3.828. kazu hirak ne’e mai postu administrativu Dom-Aleixo hamutuk 2.335, Cristo-Rei 555, Vera-Cruz 455 no Na’in-Feto 409.
Fasilidade saúde iha munisípiu Dili hanesan Hospitál Nasionál Guido Valadares (HNGV) rejista kazu dengue hamutuk 657, Klínika Fatumeta 335, sentru saúde Comoro 1.478, sentru saúde Vera-Cruz 260, sentru saúde Formoza 703, sentru saúde Becora 266, klinika moris foun ida, DMC rua, sentru saúde Atauro 12, sentru saúde Metinaro 50, klínika Bairru-Pité 60 no klínika Motael na’in-tolu.
Notísia relevante: Prevene dengue, SSM Dili hahú distribui ai-moruk abate ba postu administrativu haat
Jornalista : Felicidade Ximenes
Editór : Florencio Miranda Ximenes
