DILI, 13 outubru 2022 (TAOLI)—Komisaun G trata asuntu Edukasaun, Juventude, Kultura no Sidadania iha Parlamentu Nasionál (PN), kinta ne’e, aprova ona projeitu-lei númeru 41/V (4a)-Kódigu Direitu Autór iha nivél komisaun faze espesialidade ho votu a-favór sia (9), kontra no abstensaun 0.
Notísia Relevante: Komisaun G diskute projetu-lei Kódigu Direitu Autór to’o ona artigu 80
“Iha semana kotuk komisaun debate espesialidade aprova ona. Nune’e relatóriu ba votasaun espesialidade horisehk ho ohin tékniku sira prepara haree hela mapameantu hosi espesialidade ho anotasaun rezultadu finál tarde liu, aban komisaun sei submete ba meza PN hodi kontinua diskusaun iha plenária ba iha finál globál,’’Prezidente komisaun G, António Verdiál de Sousa, hateten ba Agéncia TATOLI iha PN, kinta ne’e.
Durante debate espesialidade komisaun hala’o durante semana tolu ho detallu kada artigu.
Projeitu lei ne’e sei fó protesaun ba artista hosi área hotu-hotu tanba diversidade artístika ne’ebé eziste iha Timor-Leste bo’ot, nune’e importante inisia lei atu bele proteje artístika no produtór hosi obra orijinál iha Timor-Leste.
Iha konstituisaun konsagra garantia no protesaun kriasaun, produsaun no komersializasaun obra literária, sientífiku no artistika, inklui protesaun legál direitu autór, nune’e prezente diploma kumpre obrigasaun konstituisionál implementasaun pakote regra ordenamentu juríduku nasionál ho padraun internasionál salvaguarda tipu direitu.
Projetu-lei refere iha artigu hamutuk 222, hahú ho nia expozisaun motivu, Títulu I Obra Protejida no Direitu Autór, Kapítulu I Obra Protejiza ho nia artigu walu, Kapítulu II Direitu Autór, Sesaun I Konteúdu Direitu Autór, Sesaun II Atribuisaun Diretu Autór ho artigu 18, Kapítulu III Autór Naran Literáriu ka Artístiku ho artigu haat.
Kapítulu IV, Durasaun sia, Kapítulu, Transmisaun no Onerasaun Konteúdu Patrimoniál Diretu Autór 16, Kapítulu VI, Direitu Morais ho artigu hitu, Kapítulu VII Rejime Internasionak ho artigu haat.
Títulu II Utilizasaun Obra, Kapítulu I Dispozisaun Jerál, Sesaun I Modalidade Utilizasaun ho artigu haat, Sesaun II Jestaun Diretu Autór iha artigu tolu.
Kapítulu II Utilizasaun Livre ho artigu neen, Kapítulu III Utilizasaun iha Espesiál, Sesaun I Edikasaun ho artigu 22, Sesaun II Reprezentasaun Sénika ho artigu 13, Sesaun III Resitasaun no Ezekusaun artigu tolu, Sesaun IV Obra Sinematográtika iha artigu 17, Sesaun V Fixasaun Fonográfika no Videográfika ho artigu walu.
Sesaun VI RádiuDifuzaun no prosesu sira seluk destina reprodusaun sinais, sons no imajen ho artigu ualu, Sesaun VII Kriasaun arte plátika, gráfika no aplikada ho artigu hitu, Sesaun VIII Obra Fotográfika ho artigu lima, Sesaun IX Tradusaun no transformasaun sira seluk ho artigu haat, Sesaun X Jornal no publikasaun periódiku sira seluk ho artigu tolu.
Títulu III Diretu Konexu iha artigu 14, Títulu IV Violasaun no Defeza Direitu Autór no Direitu Konexu iha artigu 23, Títulu V Rejistu iha artigu haat.
Títulu VI Protesaun Medida Karatér Teknolójiku no Informasaun ba Jestaun Eletrónika Direitu ho artigu 11, Títulu VII Dispozisaun Finál ho artigu rua.
Projeitu-lei ne’e aprezenta hosi Deputadu António Verdiál, Josefa Soares, Gabriela Alves, Joaquim dos Santos, Isabel Ximenes, António Benevides, Elbina Sousa, Gavriel Soares, Corneilo Gama L7, José Agostinho Sequeira Somotxo, Francisco David Ximenes, David Mandati, Leandro Lobato, Domingas dos Santos ho Bernando Quintão.
Jornalista : Nelson de Sousa
Editór : Cancio Ximenes
