Governu kontinua rekolla dadus vítima mortál funu 1975-1999
BOBONARO, 14 Outubru 2022 (TATOLI)-Ministru ba Asuntu Kombatente no Libertasaun Nasionál, Júlio da Conceição ‘Meta-Malik’, fó-sai katak, dadus provizóriu vítima mortál funu hosi tinan 1975 to’o 1999 hamutuk na’in rihun 200-resin mak Governu identifika ona hosi uma lisan sira iha territóriu nasionál.
Meta Malik relata dadus ne’e iha ámbitu inaugurasaun monumentu Saudozu eroi pátria na’in-tolu iha aldeia Tuturema, suku Atudara, postu administrativu Cailaco, munisípiu Bobonaro, sesta ne’e.
Notísia relevante: Vítima mortál funu 1975-1999 iha suku Afaça na’in-758
“Dadus provizóriu uma-lisan iha Timor laran tomak rihun 16, provizóriu seidauk kompletu, hosi uma lisan rihun 16 ne’e rihun 200-resin, seidauk kompletu tanba Oe-Cuse mós seidauk tama,” nia haktuir.
Governante ne’e hatutan, vítima hirak-ne’e la’ós de’it sidadaun timoroan maibé iha mos sidadaun xinez no malae mutin sira-ne’ebé mai Timor-Leste iha tempu okupasaun kolonializmu portugés to’o invazaun ilegál Indonézia.
“Ha’u impede labele ke’e tan ruin, tanba ruin buka la hetan, ne’e mak foti dadus uma-lisan atu identifika ema ki’ik, ema boot, ferik no katuas sira-ne’ebé mate, últimu liu tenke halo monumentu iha postu administrativu sira atu hakerek matebián siran-nia naran,” nia dehan.
Notísia relevante: Vítima mortál durante períodu funu iha suku Buruma na’in-16
Jornalista: Sérgio da Cruz
Editòr: Evaristo Soares Martins
