DILI, 14 outubru 2022 (TATOLI)– Prezidente organizasaun Grupu Arte Marsiál Persaudaraan Setia Hati Terate (PSHT), Baltazar Lemos Seixas, hateten sira nia parte sei realiza kongresu ordináriu hodi hili estrutura foun iha 20 outubru tinan ne’e.
“Ita iha ona ekipa ida monta dezde juñu nia laran atu halo kongresu iha jullu, maibe tanba akontese ho graduasaun mak kongresu ita muda to’o ohin loron, entaun ita sei realiza iha 20 outubru”, dehan Prezidente PSHT ne’e ba Agência TATOLI, sesta ne’e.
Notísia relevante:Gradua membru na’in-8.529, Governu husu PSHT kontribui ba pás-estabilidade
Objetivu kongresu ne’e hodi hili estrutura foun tanba mandatu ba estrutura agora ne’e ramata ona.
Nia dehan, kongresu ne’e hala’o ba dala haat tanba iha 31 jullu, PSHT realiza ona kongresu extra-ordináriu ida iha Timor Logde Dili no mantein nafatin estrutura tuan no ida agora ne’e foin hili fali estrutura foun.
“Kongresu ne’e ita sei hala’o durante loron rua hahú 20 to’o 21 outubru fatin iha Jináziu Dili. Ema ne’ebé iha direitu partisipa iha kongresu ne’e mai hosi Munisípiu 12 inklui RAEOA sei reprezenta ema na’in-20, nune’e totál ema na’in 300-resin mak sei partisipa iha kongresu ne’e,” nia afirma.
Dadaun ne’e, preparasaun la’o másimu ona no hein de’it atu realiza kongresu, orsamentu ba kongresu mai hosi PSHT rasik no fatin kongresu Jináziu Dili fasilita hosi Governu liuhosi Sekretáriu Estadu Juventude no Desportu (SEJD).
Notísia relevante:PSHT atualiza ba SEJD kona-ba kongresu ne’ebé sei halao iha outubru
Jornalista: Hortencio Sanchez
Editór : Florencio Miranda Ximenes
