Governu ofisializa lansa loron nasionál Liberdade Imprensa iha Balibo

BOBONARO, 16 outubru 2022 (TATOLI) — Governu liuhosi Vise-Ministru Administrasaun Estatál, Lino de Jesus Torrezão, domingu ne’e ofisializa ona loron nasionál Liberdade Imprensa iha postu administrativu Balibo, munisípiu Bobonaro iha ámbitu komemorasaun trajédia Balibo Five ba dala-47.

Atividade ne’e lansa no liuhosi serimónia husik manu Pombu mutin 16 semo, signifika atu semo iha Lelehan aas hodi fo Liberdade ba ema hotu iha direitu atu hato’o nia espresaun no opiniaun ba públiku.

Lansamentu ne’e bazea ba aprovasaun projetu rezolusaun Parlamentu Naisionál númeru 95/V(4a) ne’ebé aprezenta hosi Konsellu Imprensa, nune’e institui loron nasionál Liberdade Imprensa iha loron 16 fulan-outubru nune’e kada tinan selebra.

Iha loron ne’e mós tranforma ona Balibo sai sidade Liberdade, ne’ebé kada  tinan la’ós Konsellu Imprensa no Sentru Nasionál Chega, Institutu Públiku (CNC, I.P sigla Portugues) mak organiza de’it, maibé autoridade munisípiu Bobonaro inklui komunidade hotu bele komemora.

Notísia relevante: Governu lansa monumentu memoriál ‘Liberdade’ iha Balibo

Vise Ministru Administrasaunn Estatál, Lino de Jesus Torrezão, agradese ba inisiativa hosi Konsellu Imprensa ne’ebé organiza eventu ne’ebé ho nia objetivu  atu fó onra no dignifika kontribuisaun Jornalista estranjeiru na’in-lima ne’ebé mate iha trajédia Balibo Five tinan 1974.

Nune’e, inklui mós joirnalista sira seluk ne’ebé mate iha munisípiu seluk hodi luta ba lialoos ne’ebé mak povu Timor-Leste tomak hakarak atu hetan independénsia.

“Eventu ida-ne’e nakonu ho inspirasaun, tanba bele sai hanesan momentu reflesaun ida mai ita hotu, momentu ne’e mós bele dehan emosionál tebes, bainhira ita rona hikas faktu istóriku ida kona-bá apoiu no solidariedade ne’ebé mak ita hetan iha momentu ne’ebá hosi jornalista sira, liuliu sira na’in-lima ba ita-nia luta libertasaun nasionál,” Governante ne’e hateten.

Nia konsidera kontribuisaun jornalista na’in-lima ne’e parte ida bele loke mundu internasionál nia matan atu haree sofrimentu ne’ebé povu Timor-Leste hasoru.

“Tinan 47 liu ona, ohin ita hamutuk fali iha fatin ida-ne’e atu rekoñese no hodi bele hato’o onra ba klosan na’in-lima ne’ebé lakon sira-nia vida ba rai ida-ne’e tanba liberdade de imprensa, tanba hakarak defende lialoos.

Prezidente Konsellu Imprensa, Virgílio da Silva Guterres ‘Lamukan’, reforsa Balibo sai hanesan fatin ba espresaun polítika no diferensa polítika liuhosi monumentu integrasaun ne’ebé sai hanesan sasin ba liberdade espresaun oinsá atu determina destinu povu no rai Timor-Leste.

“Ohin ita hamutuk iha-ne’e atu hahí no hanai jornalista na’in-lima ne’e tanba ema rai seluk ho liberdade tomak determina sira-nia vida tomak atu saran-aan ba soi liberdade ne’ebé ke ohin ita hetan, ohin ita mai iha-ne’e atu tane-aas liberdade hodi garante sidadaun hotu-hotu iha rai ida-ne’e nia liberdade tenke garantidu,” nia dehan.

Virgílio lori Konselu Imprensa no CNC nia naran agrdese ba estadu liuhosi Parlamentu Nasionál ne’ebé aprova 16 outubru sai hanesan liberdade imprensa.

“Tanba ne’e mak ohin hosi fatin ida-ne’e Konselu Imprensa hakarak hato’o mós solidariedade ba maluk jornalista sira hotu iha mundu tomak, iha-ne’ebé de’it, liuliu sira-ne’ebé ké tenke mate hodi buka lialoos,” nia akresenta.

Hafoin halo lansamentu, Ministru Prezidénsia Konsellu Ministru, Fidelis Manuel Leite Magalhães no Vise-Ministru Administratsaun Estatál, Lino de Jesus Torrezão, Prezidente Autoridade munisípiu Bobonaro, Ernesto de Oliveira Barreto, partisipante tomak no komunidade Balibo, sunu-lilin no kari ai-funan hodi presta omenaajen ba jornalista estranjeira na’in-lima ne’ebé mate tanba lialoos.

Jornalista na’in-lima (5) ne’ebé mate iha trajédia “Balibo Five” ne’e mak hanesan; Greg Shackleton (reportér) ho idade 29, Tony Stewart (gravadór lian) ho idade 21, Gary Cunningham (cameraman) hosi mídia HSV-7 (Seven Network) Melbourne ho idade 27, Brian Peters (camera man) ho idade 26 no Malcolm Rennie (reportér) hosi mídia TCN-9 (Nine Network) Sydney ho idade 29.

Notísia relevante: PNTL Bobonaro preparadu asegura komemorasaun Balibo Five

Iha parte seluk, Ministru Prezidénsia Konsellu Ministru, Fidelis Manuel Leite Magalhães, hateten jornalista timoroan sira presiza konsidera ajenda internásionál hodi halo kobertura ba sofrementu ne’ebé akontese iha mundu atu haklaken  lialoos ba ema hotu.

Notísia relevante: Trajédia Balibo Five garante liberdade imprensa iha Timor-Leste

“Ha’u ho haraik-aan atu husu ba ita-boot sira katak favór ida jornalista sira, alin sira, primeiru ita-boot sira kontinua nafatin avansa ho ajenda internasionál. Espera jornalista sira kontinua hanoin ho oklu intersionalista katak sofrementu iha mundu ne’e mós sai hotu imi-nia preokupasaun iha Timor-Leste ida-ne’e,” nia fó hanoin.

Ministru Fidelis enkoraja jornalista sira atu sai mensajeiru ba mensajen sira-ne’ebé progresista, la tenke sai hanesan perdaun, no umanu ne’ebé repente de’it buat sira-ne’ebé ema seluk repente tiha ona ka repete ho analiza ne’ebé la kle’an.

Notísia relevante: Governu lansa monumentu memoriál ‘Liberdade’ iha Balibo

Jornalista: Sérgio da Cruz

Editór: Evaristo Soares Martins