DILI, 17 outubru 2022 (TATOLI)—Eis Primeiru-Ministru, Xanana Gusmão, segunda ne’e, hala’o enkontru normal ho Prezidente Repúblika (PR), José Ramos Horta, hodi troka informasaun liu-liu apoiu Xefe Estadu atu lori Timor-Leste atu adere ba Asean, nune’e vizita ba rai sira iha ASEAN ne’e importante.
Notísia Relevante: PR Horta otimista Timor-Leste sei adere ba ASEAN
“Nia (PR) informa ba ha’u aban sei halo misaun vizita Estadu ba Kamboja. Boa-viajen ba Prezidente serbisu di’ak ba no Prezidente mós hato’o katak hafoin fila hosi Kamboja sei kontinua vizita Estadu ba Portugál, depois mai fali sei ba Vietname, Singapura. Ha’u apoiu Prezidente tanba ita hotu-hotu hatene katak Prezidente apoiu loos ita atu tama ASEAN ne’ebé di’ak tebe-tebes,” Xanana Gusmão hateten hafoin ramata enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite.
Iha sorumutu ne’e, Eis Primeiru-Ministru ne’e ko’alia mós ho Xefe Estadu kona-ba proposta-lei Orsamentu Jerál Estadu (OJE) 2023 ne’ebé daudaun ne’e iha diskusaun faze audiénsia iha Parlamentu Nasionál.
Xanana, kestiona Governu prevee osan boot iha tinan oin mezmu tinan oin sei hasoru eleisaun Parlamentár.
“La’os ha’u mai atu influénsia Prezidente ne’e lae, ko’alia orsamentu iha tinan oin mai billaun $3 atu halo saida tanba haree eleisaun besik ona. No Prezidente sei hein labele komentáriu uluk tanba sei iha diskusaun iha Parlamentu Nasionál,” nia dehan.
Tuir Líder Karismatiku ne’e, ko’alia uitoan kona-ba situasaun la’ós fó konsellu ba Prezidente Repúblika maibé hanesan troka informasaun ba malu ne’e buat ida normál.
“Ha’u mak temi de’it billaun $3 hanesan ne’e. Aagora, konta responsabilidade kada tinan kotuk ba mós ita lahatene. Se tanba buat ida fundu COVID-19 rezultadu rona ba dehan seidauk mosu tan no iha COVID-19 dehan foufoun fó hela hahan ba ema sira dehan seidauk selu tan. Ne’ebé, buat sira-ne’e billaun $3 agora atu halo tan saida. Estrada barak atu monu daudaun ona iha Lolotoe ninian mais eleisaun mós besik ona, ha’u mak reasaun ida,” nia dehan.
Notísia Relevante: PR Horta: dezde uluk Malázia apoiu Timor-Leste atu adere ba ASEAN
Jornalista : Nelson de Sousa
Editór : Cancio Ximenes
