Autoridade Bobonaro sei loke prosesu investigasaun ba kazu tula pasiente ho baskulante
BOBONARO, 21 outubru 2022 (TATOLI) – Autoridade munisípiu Bobonaro, lideradu Ernesto de Oliveira Barreto, sei loke prosesu investigasaun ba kazu família tula inan isin-rua ida hosi Lontas mai Hospital Referál Maliana (HRM).
Prezidente Autoridade Munisípiu Bobonaro, Ernesto de Oliveira Barreto, fó-sai katak, segunda semana oin, hahú investiga pesoál saúde sira iha sentru saúde Lolotoe kona-bá kazu família aluga karreta baskulante tula pasiente inan-isin rua, Delfina Maia Pacheco, hosi aldeia ozo, suku Lontas, postu Administrativu Lolotoe, ba sala maternidade HRM.
Ema númeru dahuluk iha iha munisípiu Bobonaro hato’o asuntu ne’e durante halo vizita ba HRM, sesta ne’e hodi haree direita kondisaun pasiente inan-feton ne’e ho bebé mane oan ne’e.
Notísia relevante: Família aluga baskulante hosi Lontas tula inan isin-rua ba Maliana
Nia haktuir, iha loron-kinta, 20 outubru ne’e ekipa fiskalizasaun halo ona investigasaun ho parte família no pasiente, tanba ne’e presiza hakle’an tán investigasaun hosi parte pesoál saúde sira atu bele hatene verasidade hosi problema ne’e.
“Parese segunda-feira hanesan ne’e, ekipa fiskalizasaun sei tún ba halo investigasaun ba diretór ne’e, tanba informasaun hosi xefe suku dehan la’ós dala-ida de’it, maibé beibeik ona, maibé ida- ne’e hanesan informasaun de’it, loos ka lalos, ha’u-nia diretór fiskalizasaun sei tún,” Prezieente Autoridade Bobonaro ne’e promete ba família pasiente sira.
Problema ne’e Prezidente Autóridade mós lamenta tanba dehan família kontaktu dala-tolu kondutór ambulánsia nia númeru kontaktu mate hela, alende haruka família aluga rasik karreta mak lori ba sentru saúde.
Nia afirma, bainhira iha prosesu investigasaun ne’e mak ekipa sira identifika informasaun ne’e loos, sei uza nia kompenténsia hodi foti asaun ba kazu refere.
“Tanba ne’e funsionáriu, ne’ebé manán povu nia osan fulan-fulan, ita servidór estadu, entaun atendimentu públiku ne’e mais importante,” nia hateten.
Sorin seluk, Agostino Alves Cardoso, nudar la’en kaben hosi pasiente,agradese ba parteira sira-nia atendimentu tanba dadaun ne’e bebé ne’e inklui nia inan kondisaun di’ak ona.
“Iha momentu ne’ebá tanba sa’e karreta to’o mai iha-ne’e, hau sente nia kondisaun grave, ha’u sente ta’uk loos, karik horibainhira ne’e mak ami lori mai tarde, entaun la hatene loos, maibé agora di’ak hela,” nia katak.
Nia parte seidauk simu informasaun kona-ba bainhira mak bebé ho nia inan alta hosi Hospital Referál Maliana.
Notísia relevante: MS planu sosa ambulánsia multifunsaun unidade 18 iha 2023
Jornalista : Sérgio da Cruz
Editór : Evaristo Soares Martins
