Família aluga baskulante hosi Lontas tula inan isin-rua ba Maliana
BOBONARO, 19 outubru 2022 (TATOLI) – Família ida hosi aldeia Ozo, suku Lontas, postu administrativu Lolotoe, munisípiu Bobonaro, deside aluga baskulante hodi transporta inan isin rua bá Hospital Referál Maliana (HRM) tanba motorista ne’ebé kondús ambulánsia ninia númeru telefónika ‘fora da área de cobertura’.
Situasaun ne’e akontese iha loron kuarta, 19 outubtu, maizumenus tuku 07:00 dadeersan, familia deside aluga karreta baskulante hodi tula inan isin-rua ho naran Delfina Maia Pacheco, hosi aldeia Ozo, suku Lontas, postu administrativu Lolotoe, munisípiu Bobonaro ba sala maternidade Ospital Referál Maliana (HRM).
Hafoin to’o iha Hospitál Referál Maliana, tuku 10:00 dadeersan, médiku, parteira no estudante estajiadu hanoin karreta refere tula pasiente ho kondisaun moras seluk. Maibé hafoin família lori inan-isin rua ne’e sai hosi karreta laran, halo médiku sira hakfodak hodi halo atendimemtu emerjénsia no iha tuku 11:30 inan-feton ne’e partu bebé mane oan ida.
Família pasiente, Paulino Teti-Mau, sente triste no lamenta ho atendimemtu hosi pesoál saúde no kondutór ambulánsia tanba aktu sira hanesan ne’e bele fó ameasa ba ema-nia vida.
Nia hatutan, inan-feton ho idade 23 ne’e hanesan knuuk foun ida-ne’ebé presiza hetan tulun hosi médiku sira.
“Horikalan tuku 11;00-resin, ami kontaktu direita ba ekipa ne’ebé tutela hela iha Gildapil maibé sira la atende tanba dehan kalan boot liu ona, depois ohin dadeersan tuku 04;00, ami nafatin tenta kontaktu ba señora Isa, maibé nia dehan ha’u labele ba karik, bele imi buka transporte mai iha klínika ne’ebé besik, tanba ambulánsia iha-ne’e ami kontaktu númeru mate,” nia ko’alia iha Hospital Referál Maliana, kuarta ne’e.
Relasiona ho problema ne’e, família lamenta ho atendimemtu responsável sentru saúde sira, tanba hasai liafuan kasar dehan ‘imi na’in rasik aluga karreta ba’.
Tanba ne’e Paulino husu ba Ministériu Saúde atu tau atensaun nune’e situasaun ne’e labele akontese ba ema seluk, tanba atendimentu tarde perigoza ba ema-nia vida.
“Karik bele, labele ko’alia retorika de’it, ba ita-bot sira-nia kabun, hanoin mós ami (povu ki’ik sira) iha baze, kada tinan ita-boot sira aloka orsamentu boot ba ministériu ne’e, maibé realidade saida mak povu sira hasoru,” Paulino kestiona.
Parteira sala maternidade Hospitál Referál Maliana, Estela Amarál, informa inan-feton ne’e kondisaun jeralmente di’ak hela, enkuantu bebé mak kondisaun grave oituan tanba transporta hosi distánsia dook.
“Ami halo atendimentu no bebé moris ona, maibé bebé grave loos, bebé xupa fo’er barak loos, nia dada iis ladi’ak, entaun iha momentu ne’ebá, ami halo atendimentu ba bebé, agora bebé kondisaun di’ak. Ami sei nafatin observa bebé, tanba bebé ninia kondisaun seidauk di’ak loos, entaun mantein ami halo tratamentu ba nia, ami sei tau iha inkubadora no ami sei tau oksijéniu,” nia argumenta.
Jornalista : Sérgio da Cruz
Editór : Evaristo Soares Martins
