BOBONARO, 21 outubru 20022 (TATOLI – Komandante Polísia Nasionál Timor-Leste (PNTL), Munisípiu Bobonaro, Superintendente Antoninho Mauluta, apela ba membru hosi organizasaun arte-marsiál balun atu respeita membru polísia ne’ebé hala’o nia kna’ar iha terrenu.
Superintendente Mauluta hato’o apelu ne’e tanba deskonfia akontese kazu membru PSHT na’in- haat halo agresaun fíziku hasoru membru Servisu Informasaun Polísia (SIP) na’in-ida iha aldeia Rokon, suku Odomau, postu administrativu Maliana.
Notísia relevante: PNTL Bobonaro entrega suspeitu ne’ebé ameasa F-FDTL no PNTL ba Ministériu Públiku
“Sira-ne’e foin sa’e sabuk hotu, ida mai hosi Suai, ne’e mak ha’u husu sira tenke para ho hahalok ne’e, labele beibeik, dalaruma ita hatete hanesan sira-nia to’os sira-ne’e, sira halo tiha lutu, sira lakohi animál atu estraga, maibé sira hakarak sobu rasik sira-nia lutu,” nia ko’alia iha Maliana, sesta ne’e.
Komandante ne’e haktuir, kronolojia katak nia membru ne’e fila hosi atividade komemorasaun loron trajédia Balibo Five ba dala-47 atu ba ninia rezidénsia derrepente iha dalan hetan membru PSHT sira hemu lanu tuda komunidade nia uma.
Ho atitude sira-ne’e mak membru SIP ne’e tenta atua maibé joven hirak-ne’e la simu no halo kedas asaun hodi tebe ,rasta no uza fatuk atu baku nia ulun maibé la konsege.
Iha momentu ne’e kedas, Membru PNTL sira koordena ho Sub-Komisaun Reguladora Arte Marsiál (KRAM) bolu estrutura PSHT munisípiu Bobonaro mai presta deklarasaun hodi entrega joven na’in-haat ne’e ba komandu munisípiu Bobonaro iha loron 17 fulan-outubru nune’e bele submete ba prosesu identifikasaun.
“Sira na’in-haat nia kazu ne’e agora ita rejista ona iha Ministériu Públiku, ita prosesu agora ita haree ba oin, tanba ne’e sira halo asaun hasoru autoridade tanba ita-nia lei kódigu penál artigu 243 mós ko’alia, saida mak sira halo ba funsionáriu, militar no polísia,” Superintendente ne’e esklarese.
Notísia relevante: PNTL Bobonaro koloka efetivu 145 asegura graduasaun kandidatu PSHT
Jornalista : Sérgio da Cruz
Editór : Evaristo Soares Martins
