OÉ-CUSSE, 22 outubru 2022 (TATOLI)–Komunidade Rejiaun Administrativa Espesiál Oé-Cusse Ambeno (RAEOA), sesta ne’e, aprezenta identidade ka trdaisaun kultura hanesan huu karau-dikur no flauta, kantiga hamoos duut, kantiga kolleta bani-been, tebe tradisionál, kantiga ko’a tua, hanesan kultura orijinál Atoni Oé-Cusse nian iha karavana turístika.
Eventu karavana turístiku ne’e organiza hosi Unidade Turizmu Komunitáriu ne’ebé tutela iha Gabinete Prezidente Autoridade RAEOA hodi festeza loron mundiál turizmu nian ne’ebé kada tinan selebra iha 27 setembru ho tema “Hanoin Hikas Loron Turizmu”.
Prezidente Autoridade RAEOA, Arsenio Paixão Bano, hato’o parabéns ba povu Oé-Cusse tanba partisipa másimu hodi hatudu identidade kulturál no promove produtu prioridade Oé-Cusse nian iha loron mundiál turizmu ne’e.
“Se ita maneja didi’ak, ita sei promove kada tinan tanba rai ne’e kontinua dezenvolve ba oin, Se ita haluha lakohi hatudu, tinan lima mai bele lakon ona. Jersaun foun mai laiha ona kuiñesimentu kona-ba ohin ita hatudu ne’e. Entaun, ida-ne’e ita hotu nia responsabilidade atu kontinua promove, tenke preserva ba jerasaun foun sira, nune’e ita-nia kultura labele lakon,” Arsénio Paixão Bano hatete iha enseramenntu karavana turistiku hodi komamora loron mundiál turizmu ne’e.
Xefe suku Cunha, Domingos Seko Caunan, agradese tanba iha loron mundiál ba turizmu ne’e bele partisipa hodi hatudu produtu lokál no tradisaun kulturál entre suku 18 iha Oé-Cusse.
“Ha’u apresia teb-tebes tanba hosi 18 suku bele hatudu idak-idak nia konstume kultura, produtu lokál iha suku laran atu promove iha eventu importante ne’e, ne’ebé ohin ita haree kultura suku 18 lahanesan, idak-idak ho ninian, entaun ida-ne’e sai bukae ida ba jerasaun foun atu banati tuir labele haluha,” nia orgullu.
Entretantu, komemorasaun loron mundiál turizmu ne’e ho objetivu atu promove pontu tolu no iha avaliasaun no prémiu ba unidu desfile durante partisipa iha promosaun ne’e, trajén vestuáriu tradisionál orijinál kada suku idak-idak no ikus mak aprezenta muzika ka kantiga orijinál kada suku ida-idak nian.
Iha ámbitu komemorasaun ne’e kada suku apresenta talenta musikál ho modelu kultura, hanesan hosi suku Usitasa’e, sub-rejiaun Oésilo aprezenta huu karau dikur no flauta nu’udar tradisaun kultura orijinál iha suku refere.
Hosi suku Bene-Ufe, sub-rejiaun Nítibe aprezenta kantiga kolleta bani-been iha ai-leten, tebe tradisionál aprezenta hosi suku Abani sub-rejiaun Passabe, no kantiga hamoos duut aprezenta hosi suku Ban-Afi.
Hafoin aprezenta identidade kulturál ne’e, Xefe suku Usitasa’e, Tomas Ulan Colo, halo intrudusaun ba audiénsia sira katak huu karau-dikur no nu’udar tradisaun ida uza bainhira halo serimónia uma lisan nian, nune’e mós huu flauta bainhira hein manu-lin iha natar tempu atu kolleta hare.
Nune’e, nia hato’o agradesimentu ba Autoridade RAEOA liuhosi Unidade Turizmu Komunitáriu, tanba ho inisiátiva bele promove kultura orijinál kada suku liuhosi kompetisaun ida ba kada suku idak-idak atu hatene sira-nia kultura.
Jornalista : Abílio Elo Nini
Editór : Cancio Ximenes
