DILI, 23 outubru 2022 (TATOLI)—Tribunál Distritál Dili (TDD), domingu ne’e, halo prosesu primeiru interrogatóriu ba arguidu FFX, nu’udar Diretór ajénsia viajen, New Generation.
Perante prosesu primeiru interrogatóriu, iha sala julgamentu Ministériu Públiku (MP) ne’ebé reprezenta hosi Prokuradora, Lídia Soares, imputa arguidu ho krime tráfiku umanu, ne’ebé previstu iha artigu 163 no 164 hosi kódigu prosesu penál Timor-Leste.
Durante prosesu legál, MP husu ba Tribunál atu aplika medida prizaun preventiva tanba aktu ne’ebé arguidu komete konsidera hanesan krime ne’ebé imputa ba nia.
Maski nune’e, Defeza arguidu FFX, Defesór Públiku, Eustaquio Guterres, la aseita ho MP nia alegasaun ba nia kliente tanba konsidera la nesesáriu no la prenxe rekezitu, tanba arguidu deklara iha primeiru interrogatóriu katak la’ós nia maka haruka ema sira bá rai-li’ur, maibé nia só trata de’it dokumentu lezadu sira.
“Ema sira ne’e maka ba buka nia (arguidu) iha nia kompañia hodi husu trata dokumentu no sosa billete, nune’e husu ajuda ba arguidu oinsá maka fasilita ema sira ne’e atu bá iha rai-li’ur, maibé arguidu rasik la promote lezadu sira atu hetan serbisu iha rai-li’ur,” Defeza arguidu, Eustaquio Guterres deklara iha TDD, Colmera.
Notísia relevante: Diretór ajénsia New Generation submete ba primeiru interrogatóriu
Razaun MP husu ba Tribunál aplika prizasaun preventiva tanba atu asegura arguidu labele halai ses hosi krime, ne’ebé posibilidade bele komete fali krime seluk tuir artigu 183 hosi kódigu prosesu penál.
“Hanesan parte Defeza arguidu nian, ha’u la simu medida koasaun prizasaun preventiva ne’ebé Ministériu Públiku husu ba Tribunál atu aplika ba ha’u-nia kliente, tanba buat sira ne’ebé Ministériu Públiku mensiona iha alegasaun ne’e arguidu kumpre hotu, nia la halai ses hosi justisa no la komete tan fali krime seluk. Tanba ne’e, medida prizaun preventiva la nesesáriu atu aplika ba nia kliente FFX,” nia argumenta.
Hanesan Defeza, nia husu ba Tribunál atu aplika Termu Identidade Rezidénsia (TIR) ne’ebé nu’udar medida kama’an liu no medida ida todan liu maka aprezentasaun períodika.
Hafoin rona tiha alegasaun, Tribunál deside adia hikas prosesu primeiru interrogatóriu iha segunda (24/10) tuku 14:00 lorokraik hodi lee sai despaixu ikus ba kazu ne’e.
Prosesu primeiru interrogatóriu ne’e prezide hosi juíz singulár, Alvaro Maria.
Jornalista : Natalino Costa
Editora : Julia Chatarina
