Top

CI konsidera komandu PNTL tenta kriminaliza produtu jornalizmu

Jornalista sira halo asaun nonook iha Casa Europeia nia oin iha tinan hirak liu ba. Imajen/Doc. TATOLI: António Daciparu.

DILI, 25 outubru 2022 (TATOLI)—Prezidente Konsellu Imprensa (CI), Virgílio da Silva Guterres, hateten, CI konsidera komandu Polísia Nasionál Timor-Leste (PNTL) kriminaliza produtu jornalizmu nian, tanba notifikasaun ba diáriu Independente ne’e ho baze kodigu prosesu penál no la’ós bazea ba lei komunikasaun sosiál.

Notísia Relevante: TLPU ezije komandu PNTL anula karta notifikasaun ba Independente

Prezidente Conselho de Imprensa (CI), Virgílio da Silva Guterres, hamutuk ho estrutura hala’o konferensia imprensa iha salaun CI, Quintal Boot, Dili, tersa (25 outubru 2022). Imajen Tatoli.Osória Marques.

“Dahuluk Konsellu Imprensa hakarak halo protestu ba PNTL ne’ebé mak halo notifikasaun ba kolega jornalista ho nia editór hosi Independente tanba referénsia ne’ebé PNTL halo ne’e baze ba kodigu prosesu penál, la’ós lei komunikasaun sosiál no asuntu ne’e ami konsidera PNTL tenta atu kriminaliza ba produtu jornalismu nian. Entaun, la’os kriminaliza no viola de’it lei komunikasaun Sosiál maibé viola mós konstituisaun RDTL artigu 23,” Virgílio Guterres hateten ba jornalista sira, liuhosi iha konferénsia imprensa, iha salaun CI Quintal Boot, Dili, tersa ne’e.

Tuir loloos, tuir nia, iha produtu jornalizmu mak kontra kodigu étika ruma, PNTL halo notifikasaun ne’e bazea ba lei komunikasaun sosiál, liu-liu direitu de resposta no retifikasaun.

“PNTL bele halo protestu ba produtu jornalizmu karik halo maibé tenke uza lei komunikasaun Sosiál labele uza kodigu prosesu penál. Ha’u hanoin ko’alia kona-ba lei no orden ne’e PNTL mak hatene no ha’u fiar katak PNTL sei retira karta notifikasaun. Maibé kuandu PNTL mak la retira mak CI hamutuk ho asosiasaun jornalista sira sei halo protestu,” nia dehan.

Tanba ne’e, CI husu ba Komandu Jerál PNTL atu retira notifikasuan ne’ebé Servisu Investigasaun Kriminál Nasionál haruka ba Redasaun Diáriu Independente tanba la tuir ninia dalan loloos hanesan haktuir iha Lei Komunikasaun Sosiál, artigu 34 kona-ba direitu resposta no direitu retifikasaun.

Conselho de Imprensa prontu sai mediadór atu halo mediasaun ba kazu desputa entre PNTL no Diáriu Independente hodi hetan solusaun ida-ne’ebé justu no loloos ba parte rua tuir Lei Komunikasaun Sosiál.

Husu ba Komandu Jerál PNTL atu rezolve kazu sivil entre mídia no polisia ne’ebé ninia kauza mai hosi publikasaun notísia ka produtu jornalístiku ho Lei Komunikasaun Sosiál, artigu 34 kona-ba direitu resposta no direitu retifikasaun, la’ós uza fali Kódigu Prosesu Penál hodi notifika no kondena jornalista no mídia sira tanba sira-nia obra jornalístiku.

CI husu ba entidade Estadu hotu-hotu atu respeita jornalista no mídia nia servisu iha kontestu kobertura no publikasaun notisia, tamba jornalista no mídia hala’o ninia papel kontrolu sosiál nu’udar pilár demokrasia iha país demokrátiku hanesan Timor-Leste.

Bainhira PNTL la retira karta notifikasaun, Prezidente CI hateten, instrumentu ikus ba kazu ne’e mak manifestasaun tanba lei fó dalan hela, nune’e bele fó ninia solidariedade ba nia maluk jornalista ne’ebé Estadu kriminaliza.

“CI nota notifikasaun ne’e katak PNTL laiha lina koordenasaun tanba fó ona sensibilizasaun kona-ba lei komunikasaun Sosiál maibé sira la uza referénsia ne’ebé mak iha hodi justifika,” nia dehan.

Husu kona-ba estimentu TLPU nian kona-ba CI falla halo sensibilizasaun lei komunikasaun sosiál, CI apresia Timor-Leste Press Union (TLPU) no CI iha obrigatóriu atu kontinua halo advokásia.

Hafoin ne’e, jornalista tenta atu halo konfirmasaun ba Komandui Jerál PNTL ba kazu refere maibé hosi parte PNTL sei halo konferénsia imprensa iha kuarta (26/10) aban.

Tanba, iha konstituisaun RDTL artigu 23 (Interpretasaun kona-ba direitu fundamentál sira) katak direitu fundamentál sira-ne’ebé konsagra iha Lei-Inan la hasai direitu selu-seluk ne’ebé temi iha lei no tenke interpreta sira tuir Deklarasaun Universál Direitu Umanus nian.

Notísia Relevante: Kazu Komandu PNTL notifika Independente, AJTL sei haruka karta ba Xefe Estadu

Jornalista : Osoria Marques

Editór       :  Cancio Ximenes

Publisidade

Leave a Reply

Latest Post

error: Content is protected !!