Timor Resource hahú teste kapasidade produsaun mina iha posu Liurai no Feto Kmaus
DILI, 26 outubru 2022 (TATOLI)— CEO Timor Resource, Sullen Osborne, kuarta ne’e, hala’o audénsia ho Prezidente Repúblika, José Ramos Horta, hodi atualiza prosesu teste kapasidade mina-matan Liurai no Feto Kmaus iha kosta súl.
“Ohin, ami mai relata relatóriu ba Prezidente Repúblika kona-ba perfurasaun mina matan iha kosta súl ne’ebé tama ona iha faze esplorasaun nian, nune’e mina-matan ne’ebé ita fura ona sei iha tan teste hodi haree ba kapasidade produsaun nian”, dehan Ceo Timor Resource hafoin ramata reuniaun ho Xefe Estadu, iha Palásiu Presidensiál, Bairru-Pité-Dili.
Notísia relevante: Rezultadu teste laboratóriu mina iha posu Feto Kmaus iha perspetiva di’ak
Tuir nian perfurasaun ho progresu di’ak tebes tanba halo ona perfurasaun ba mina matan rua no dadaun tama ona ba perfurasaun datoluk ho nia perfunidade metru 1.300 posu ida ne’e mak sei kle’an liu iha planu tanba sei fura to’o metru 3.300.
Atividade prefurasaun mina-matan hirak ne’e iha koordenasaun no servisu hamutuk ho órgaun reguladór Autoridade Nasionál Petróleu no Minerál (ANPM) hodi autoriza submisaun no aprova pedidu sira ba perfurasaun.
“Mina matan rua hanesan Liurai no Feto Kmaus sei iha faze esplorasaun nian no iha potensia, maibé sei hein teste bainhira ramata ona mak ita foin loke fali hodi haree mina sulin sai ona mak foin bele sukat hodi haree kapasidade produsaun”.
“Prezidente Repúblika ema ida ne’ebé ho vizaun luan, nia vizaun ema hotu iha mundu rona, nia vizaun ne’e hanesan hotu Timor Resources nian”, nia hateten.
Notísia relevante: Perfurasaun mina posu Feto Kmaus Covalima iha sinál pozitivu
Jornalista: Hortencio Sanchez
Editór : Florencio Miranda Ximenes
