iklan

EKONOMIA, HEADLINE

TIC Timor, I.P iha planu prioridade tolu ba tinan 2023

TIC Timor, I.P iha planu prioridade tolu ba tinan 2023

Diretór Ezekutivu TIC Timor, I.P, Roberto Caetano de Sousa Vicente. Imajen Tatoli/Francisco Sony

DILI, 04 novembru 2022 (TATOLI)—Ajénsia Teknolojia Informasaun no Komunikasaun, Institutu Públiku (TIC Timor, I.P) iha ona programa prioridade tolu ba tinan 2023.

“Ita iha programa prioridade tolu iha tinan 2023 ne’ebé sei foku ba kontinuasaun estabelesimentu baze infraestrutura, kontinuasaun programa identidade únika no importante liu mak kontinuasaun ba implementasaun polítika Governu dijitál,” Diretór TIC Timor, I.P, Roberto Caetano de Sousa Vicente, informa ba Agência Tatoli liuhosi entrevista eskluziva, sesta ne’e.

Nia konsidera, planu prioridade kontinuasaun ba estabelesimentu baze infraestutura ne’e importante ba Governu eletróniku hodi hatan ba sentralizasaun dadus iha TIC ne’ebé ho modelu seguru no asesível.

Aleinde ne’e, kontinuasaun programa identidade únika ne’e importante tanba ho hanoin hakarak atribui númeru identifikasaun dijitál ba populasaun tomak hodi hafasil Governu presta servisu ba povu tomak hodi bele asesu servisu no setór privadu sira seluk.

Notísia relevante: TIC Timor, I.P no SEA introdús website ambiente

Liga ba kontinuasaun implementasaun polítika Governu dijital nian, institutu públiku ne’e hatuur ona iha dokumentu estratéjiku hanaran Timor Dijitál 2022-2032 hodi hamosu nosaun atu dijitaliza Governu nia servisu tomak.

“Ita hakarak atinje meta iha Planu Dezenvolvimenru Nasionál (PDN) no planu polítika formalizasaun no rekezitu sira seluk iha Asosiasaun Nasaun Sudeste Aziátiku (ASEAN, sigla inglés), Komunidade País ho Lian Portugés (CPLP, sigla portugés) no seluk tan. Tanba ne’e, ita tenke investe maka’as iha servisu dijitalizasaun ne’e tanba ita labele kontinua servisu manuál,” nia akresenta.

TIC Timor, I.P prevee $6.765.437 iha Orsamentu Jerál Esatdu (OJE) 2023 ba programa rua hanesan boa governasaun no jestaun instituisionál ho alokasaun $893.730 no programa teknolojia informasaun no komunikasaun ho orsamentu $5.871.707.

Programa boa governasaun no jestaun instituisionál iha nia sub-programa ida de’it mak jestaun instituisionál ho nia orsamentu hamutuk $893.730 no iha atividade tolu ne’ebé ko’alia kona-ba jestaun finanseira, administrasaun no lojístika, rekursu umanu indireta no formasaun no kapasitasaun rekursu umanu.

Programa teknolojia informasaun no komunikasaun rasik iha sub-programa haat ho atividade ualu, hanesan sub-programa identidade dijitál $2.755.153, siklu dezenvolvimentu sistema no aplikasaun $1.058.470, apoiu inisiativa TIC nasionál $547.200, inklui infraestrutura rede Governu $1.510.884.

Atividade ualu kona-ba rejistrasaun no validasaun ba identidade dijitál, formasaun ba formadór sira, garante asesu públiku ba servisu Governu eletróniku, mellora asisténsia servisu tékniku, formasaun IT infrastrutura no seluk tan.

Hasoru difikuldade iha rekursu umanu 

TIC Timor, I.P hasoru mós difikuldade iha parte rekursu umanu durante hala’o kna’ar.

“Ha’u hanoin rekursu umanu buat difísil loos, tanba ezemplu ita atu identifika timor-oan ne’ebé klasifikadu duni ba área TIC nian ne’e susar,” Roberto Caetano, esplika.

Ho problema rekursu umanu ne’e maka tinan ne’e institutu atu konklui enkuadramentu pesoál hodi prienxe kuadru importante sira.

“Realidade seidauk maka dalabarak susar hetan ema sira ne’ebé kualifikadu atu ba kaer serbisu ho Ajénsia TIC. Dalaruma ita atu atrai ema mai serbisu, dahuluk sira husu mak serbisu ne’e kleur ka lae. Enkuantu ami rasik labele garante ida-ne’e tanba dekretu-lei TIC nian kontratu tinan-ida, entaun ita labele fó seguransa serbisu ba sira,” nia tenik.

Iha parte seluk, institutu ne’e hakarak hamosu inovasaun foun no aselera dezenvolvimentu iha setór TIC ho hanoin atu hasa’e kualidade ema iha setór informátika ne’ebé ho xave tenke investe uluk iha ema tanba sentru dezenvolvimentu ne’e tenke iha ema.

Ho dezafiu hirak ne’e, Diretór Ezekutivu TIC Timor, I.P sujere Governu hodi hahú integra matéria Informasaun Teknolojia (IT) iha kuríkulu eskola.

“Governu tenke dezenvolve IT, hahú integra ona iha kuríkulu eskola iha nível ensinu báziku sira nune’e bele fasilita estudante sira kompreende no bainhira sira boot bele hili opsaun,” nia fó hanoin.

Aleinde ne’e, polítika Governu nian liga implementasaun fibra ótika submarina ne’ebé sei mai hanesan área foun, maibé tenke rekoñese katak rekursu umanu seidauk sufisiente.

“Ita tenke prepara ema kualifikadu iha área espesífiku sira, nune’e bainhira ita-nia kabu ne’e mai, la presiza gasta tempu hein fali tanba ita iha ema ona atu kaer operasaun sira, maibé ida-ne’e ita-nia parseiru dezenvolvimentu hosi Governu Austrália hahú ona fó kapasitasaun ba pesoál sira ne’ebé envolve projetu Timor-Leste’s South Submarine Cable (TLSSC).

Dezafiu seluk mak vontade liña ministeriál sira, ne’ebé balun to’o agora seidauk halo koneksaun ba TIC Timor iha sentru dadus elektróniku, maski TIC Timor hanesan instituisaun Estadu ne’ebé nia papél atu sentraliza dadus Governu elektróniku iha fatin ida.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!