VIQUEQUE, 04 novembru 2022 (TATOLI)—Ministériu Solidaridade Sosiál no Inkluzaun (MSSI) rejista uma-kain 23.671 iha munisípiu Viqueque sei sai benefisiáriu ba subsísidu fim do ano.
“Ha’u haruka ona dadus agregadu uma-kain 23.671 hosi munisípiu Viqueque bá nasionál, ne’ebé sei hetan subsídiu fim do ano. Hosi dadus sira-ne’e nasionál haruka mai munisípiu iha fulan-outubru hodi haruka ba postu administrativu hodi halo verifikasaun hotu. Ha’u submete fali bá nasionál iha loron 06 outuburu,” Diretór Diresaun Servisu Apoiu Sosidade Sivil munisípiu Viqueque, Cosme Sarmento, hateten ba Agência Tatoli, iha administrasaun munisipál, sesta ne’e.
Nia dehan, dadus hosi aldeia balun la konsege rejista tanba xefe aldeia submete lista uma-kain tarde.
“Aldeia Kaninuk, suku Bahalara Uain, postu administrativu Viqueque vila maka la rejista lista benefisiáriu tanba xefe aldeia hatama dadus tarde, ha’u hein kuaze semana ida. Entaun ha’u sente aldeia ida labele hamate ema iha munisípiu ida-ne’e, tanba ne’e ha’u lori kedas lista sira bá nasionál. Foin lalais ha’u koko konsulta bá nasionál hodi lori fali lista hosi aldeia Kaninuk nian maibé ema nasionál la hatan. Ha’u hanoin dala ruma aldeia Kaninuk nian sei uza lista uma-kain hosi cesta bázika tinan 2020 nian,” nia akresenta.
Notísia relevante: Governu deside uma-kain hotu simu subsídiu $200
Maski la rejista, maibé abitante sira sei hetan hotu diretu, maibé ema sira ne’ebé naran laiha lista no saláriu fulan-ida $500 ba leten maka sei la hetan.
MSSI tuir planu sei lansa pagamentu subsídiu fim do ano nível nasionál iha loron 16 novembru, maibé munisípiu Viqueque seidauk iha data fixu.
Dadus benefisiáriu ba programa nasionál ne’e, postu administrativu Lacluta 2.321, Ossu 5.740, Uatucarbau 2.147, Uatulari 6.014 no Viqueque vila 7.449.
Alterasaun dahuluk dekretu-lei númeru 37/2022, loron 25 maiu, kona-ba subsídiu fim do ano ba uma-kain, prosede ba atribuisaun subsídiu $200 ba kada uma-kain hotu iha territóriu Timor-Leste.
Artigu 2 iha dekretu-lei hanesan mensiona katak benefisiáriu sira ba subsídiu ne’e hanesan uma-kain sira ne’ebé rejistadu ona iha livru rejistu uma-kain iha suku, iha teritóriu nasionál tuir termu previstu iha diploma ministeriál númeru 49/2017 23 agostu.
Uma-kain ne’ebé sai benefisiáriu ba hirak ne’ebé rejistadu ona iha livru rejistu uma-kain to’o loron 28 agostu 2022.
Ministériu Administrasaun Estatál (MAE) submete ona dadus uma-kain 39.000 ba MSSI ho totál pagamentu millaun $7,8 resin.
Jornalista : Vitorino Lopes da Costa
Editora : Julia Chatarina
