iklan

DILI, POLÍTIKA, SAÚDE

Membru PN husu Governu mellora fasilidade-atendimentu saúde ba povu

Membru PN husu Governu mellora fasilidade-atendimentu saúde ba povu

Membru Governu ho Parlamentu Nasional, hala'o diskusaun jeneralidade Proposta OJE tinan 2023, iha sala plenáriu PN, kuarta (09/11). Imajen TATOLI/Francisco Sony

DILI, 09 novembru 2022 (TATOLI)-Menbru Parlamentu (PN) liuhosi Deputada partidu Congreso Nacional da Reconstrução Timorense (CNRT), Frente Revolsionario Timor-Leste Indepedente (Fretilin) no Partidu Unidade Dezenvolvimentu Demokrátiku (PUDD) husu Ministéiru Saúde (MS) iha proposta lei Orsamentu Jerál Estadu (OJE) 2023 atu mellora fasilidade no atendimentu saúde ba povu.

Notísia Relevante: OJE 2023: MS prevee millaun $63-resin prioritiza prestasaun serbisu saúde ba populasaun

“Povu halerik ba ambulánsia ne’ebé mak mina ense ba ambulánsia laiha atu tula pasiente sira, laiha tratamentu ba sira nia moras, ai-moruk esensiál realidade estoke aut iha ita-nia nasaun ne’e,” Deputada CNRT, Maria Gorete Gorumali, hato’o liuhosi intervensaun iha debate proposta-lei Orsamentu Jerál Estadu (OJE) 2023 iha faze jeneralidade ba loron datoluk, iha PN, kuarta ne’e.

Nune’e mós, husu Governu atu mellora fasilidade tanba iha ekipamentu médiku barak avaria tantu iha ospitál, sentru saúde no postu saúde, oinsá mak pesoál saúde fó atendimentu di’ak pasiente sira bainhira ekipamentu aat no mós laiha manutensaun.

Deputada Fretilin, Gabriela Alves, apresia proposta OJE 2023 Governu prevee atu konstrui postu saúde maibé nia sujere presiza haree konstrui tan sentru saúde tanba haree ba jeografia populasaun, nune’e fasilita atendimentu di’ak ba povu iha baze.

“Iha diskursu, Primeiru-Ministru nian sita sei halo konstrusaun postu saúde foun 25 no rezidénsia profisionál saúde polítika ne’e importante tebes, maibé la’ós ita atu haree de’it postu saúde maibé presiza mós harii sentru saúde. Ttanba, área jeográfia ne’ebé boot no luan presiza kria mós sentru saúde entre postu saúde hodi fasilita ita-nia komunidade sira iha baze,” nia dehan.

Deputada hosi bankada Governu ne’e husu mós Governu liu-hosi Ministéiru Saúde oinsá atu haree haruka médiku timoroan ba kontinua foti espesialidade no estabelese sentru kardeolójia atendimentu ba moras sira-ne’ebé durante ne’e sempre haruka ba rai-li’ur.

Notisia Relevante: 2023, MS promote estabelese unidade kardiolojia iha Timor-Leste

“Ita-nia rai ne’e ema hotu-hotu preokupa tanba sa ita-nia moras sira-ne’ebé iha ita labele kura (tratamentu) iha Timor tenke lori ba li’ur, ami hanoin medida sira Governu nian bele kria haruka ita-nia médiku sira ba hasai espesialidade, nune’e ita bele evita ona haruka pasiente ba li’ur,” nia husu.

Deputadu PUDD, António de Sa Benevides, sekunda ho intervensaun deputadu sira-nian iha área saúde nesesáriu duni atu tau atensaun tanba ida-ne’e mak situasaun real.

Iha parte seluk, nia fó enfaze liu ba saúde mentál bazea ba dadus ne’ebé iha kuaze ema 1000-resin ne’ebé hetan problema saúde mental ida-ne’e baluk labarik, joven, idozu.

“Sira hetan moras la grave maibé ai-moruk mak laiha bele halo moras sira-ne’e, bele sai to’o grave. Hanoin ida, Ministéiru Saúde presiza konsidera didi’ak hanesan ai-moruk ba moras mentál promozin, sodium, flupenazin, presperidon no sira seluk,” nia hateten.

Nune’e, reprezentante povu iha uma fukum iha esperansa boot ba Governu iha proposta OJE ne’e bele tau atensaun.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!