iklan

EKONOMIA, BOBONARO, HEADLINE, INKLUZAUN SOSIÁL, MUNISÍPIU

PDHJ Maliana preparadu monitoriza distribuisaun subsídiu $200

PDHJ Maliana preparadu monitoriza distribuisaun subsídiu $200

Diretór PDHJ Territoriál Bobonaro, Domingos Pinto Tavares. Imajen Tatoli/Sérgio da Cruz.

BOBONARO, 09 novembru 2022 (TATOLI) – Ekipa Provedoria Direitu Humanu no Justisa (PDHJ), Delegasaun Territórial Maliana, preparadu monitoriza distribuisaun subsídiu ‘fim do ano’ $200 ba uma-kain ne’ebé tuir planu sei lansa iha loron 16 fulan-novembru.

“Distribuisaun $200 ne’e ekipa sempre prontu, tanba ida-ne’e orientasaun, ne’e ita-nia serbisu no sein dúvida,” Diretór Provedoria Direitu Humanu no Justisa (PDHJ), Delegasaun Territoriál Maliana, Domingos Pinto Tavares, ko’alia iha Soso, Maliana, kuarta ne’e.

Notísia relevante: Pagamentu subsídiu $200 ba uma kain, posibilidade sei altera dekretu-lei

Domingos Pinto subliña, monitorizasaun ne’e labele kobre suku 50 tomak, tanba problema rekursu umanu no kestaun distánsia, entaun sei uza eskema prioridade ba suku sira-ne’ebé tinan kotuk mosu irregularidade iha momentu xefe suku sira atribui orsamentu ba benefisiáriu sira.

Reponsável PDHJ Maliana ne’e rekomenda lideransa komunitária suku 50 atu serbisu ho transparánsia no profisionál.

“Imi maka na’in ba povu, ne’ebé ha’u fiar imi hotu iha munisípiu Bobonaro, Ermera no Covalima, ne’ebé sai área jurizdisaun PDHJ Maliana nian, atu halo distribuisaun $200 ba ita-nia populasaun ho laran moos no responsabilidade tanba buat kiik ne’ebé maka imi halo sala, ninia impaktu ne’e boot tebes, ne’ebé imi tenke sukat buat-sira ne’e katak $1 ho $2 ne’e la sukat ho ita-nia dignidade,” nia fó hanoin.

Enkuantu tuir dadus hosi Sentru Solidariedade Sosiál no Inkluzaun Munisipiu Bobonaro, xefe família iha munisípiu Bobonaro ne’ebé elijível atu simu subsídiu ne’e  hamutuk 28,553 ho totál orsamentu $5,710.600.

Notísia relevante: Prezidente Repúblika husu Governu altera lei ba subsídiu $200

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!