iklan

NASIONÁL, POLÍTIKA

ANPM atualiza progresu konstrusaun biblioteka nasionál

ANPM atualiza progresu konstrusaun biblioteka nasionál

Governu liuhosi Autoridade Nasionál Petróleu no Minerál (ANPM, siglá-portugés), lidera enkontru Steering Committee hodi atualiza progresu konstrusaun biblioka nasionál, kinta (17/11). Imajen/Mídia SEAK.

DILI, 17 novembru 2022 (TATOLI)—Governu liuhosi Autoridade Nasionál Petróleu no Minerál (ANPM, siglá-portugés), kinta ne’e, lidera enkontru Steering Committee hodi atualiza progresu konstrusaun biblioka nasionál ne’ebé tuir planu sei halo iha Hudi Laran, Bairu Pite, Dili.

“Ohin, ami reuniaun ne’e mak reuniaun Steering Committee. Ida-ne’e nível ida-ne’ebé altu ba iha projetu konteúdu lokál hodi hatuur projetu biblioteka nasional. Entaun, ohin, hanesan reuniaun sira-ne’ebé mak ami halo regularmente no reuniaun ida-ne’e, objetivu atu atualiza progresu hodi progresu ida-ne’e ita bele haree milestone (tonggak pencapaian) sira-ne’ebé ita atinje,” Prezidente Autoridade Nasionál Petróleu no Minerá, Florentino Soares Ferreira, informa ba Ágência TATOLI bainhira ramata enkontru Steering Committee iha salaun ANPM Aitarak Laran, Dili, kinta ne’e.

Atividade ba konstrusaun biblioteka nasionál ne’e emprogresu no sei halo diskusaun ho parte relevante, atu nune’e bele deside iha tempu badak.

Maibé, atu dehan de’it ba públiku katak atividade aprozionamentu ne’e emprogresu hela no to’o ba tempu, ANPM anúnsia sé mak manán-nain tanba ida-ne’e liga ho progresu ne’ebé sei kontrata emprezáriu sira iha nível internasionál. Tanba, prosesu aprovizionamentu ne’e la’os ANPM no Sekretáriu Estadu Arte no Kultura nian, tanba osan ne’e na’in mak ENI, purtantu ENI mak halo tuir nia polítika ka prosedimentu tomak ligadu ho aprovizionamentu ninian rasik.

“Entaun, ita laiha parte iha laran no sira-nia prosesu lori to’o ba iha sira-nia parte jerál iha Milan ITALIA. Ho ida-ne’e mak ita sempre depende ba ENI, nia atu bele fó atualizasaun kona-ba progresu maibé ita bele dehan servisu emprogresu. Kona-ba atualizasaun manán-na’in, ida-ne’e ita seida’uk to’o ba iha ne’ebá tanba ita sei hein hela hosi ENI,” nia esplika.

Notísia Relevante: Aban, ANPM anúnsia kompañia halo konstrusaun “Biblioteka Nasionál”

Kona-ba bainhira mak fó sai manán-na’in ba konstrusaun biblioteka nasionál, nia hatán, ida-ne’e depende ba progresu ikus ne’ebé mak ENI sei halo.

“Se ita bele hatene iha tinan ida-ne’e nia laran, tanba ha’u labele komenta kona-ba órariu ida-ne’ebé mak ENI iha internálmente. Tanba, iha momentu ne’e sira sei fó fali kalendáriu mai ami bainhira kalendáriu ne’e iha ona. Ita hatene anúnsiu kontratór manán-na’in ne’e bainhira depois ita atu asina bainhira. Aleinde ne’e, asina tiha sei tama ba iha faze Detail Engineering Design (DED), depois mak ema kontratór sei prepara nia mobilizasaun tomak depois mai halo,” nia dehan.

Maibé, hosi ANPM nia parte mak halo kona-ba supervizaun konsultór, hanesan konsultór ne’ebé mak sei reprezenta ANPM iha atividade konstrusaun biblioteka nasionál.

“Sira ne’e, ami ramata ka termina ona no hetan ona manán-na’in maibé ami seidauk asina kontratu, entaun ami labele anúnsia lai ba ida-ne’ebé sei halo supervizaun. Maibé, agora kontratór lolos ba osan ne’ebé alokadu provolta millaun $10 ne’e hosi ENI nia sistema aprovizionamentu, ne’ebé momentu ne’e ha’u labele ko’alia uluk fali duké ENI atu fó hatene ami,” nia hateten.

Entretantu, tuir Prezidente Autoridade Nasionál Petróleu no Minerál, Florentino Soares Ferreira, katak enkontru Steering Committee ne’e lidera hosi ANPM, tanba fundu konteúdu lokál hosi projetu mina.

“ANPM mak hanesan reguladór ba ita-nia atividade mina no gás iha rai-maran no ANPM mak lídera ita-nia prosesu sira-ne’e, kompostu mós hosi Sekretáriu Estadu Arte no Kultura (SEAK) no mós reprezentante sira hosi empreza ENI,” nia dehan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!