VIQUEQUE, 18 novembru 2022 (TATOLI)—Bee Timor-Leste, Empreza Públika (BTL, E.P) konsege rekolla reseita hamutuk $5.423,90 ba kofre Estadu, hahú hosi maiu to’o novembru tinan ne’e.
“Reseita sira-ne’e mai hosi konsumidór bee-moos ne’ebé BTL, E.P distribui ba komunidade iha sidade Viqueque,” Koordenadór Servisu BTL, E.P Viqueque, Marito da Costa, hateten iha salaun edukasaun munisípiu Viqueque, Beloi, sesta ne’e.
Notísia relevante: BTL, E.P Viqueque rekolla ona reseita $1.585 durante fulan-neen
Uma-kain 27 iha parte zona 1 Beloi hanesan kliente bee-moos, ne’ebé kada kliente selu $5 ba kada fulan.
Servisu ezistente BTL, E.P iha munisípiu Viqueque, hahú iha loron 14 dezembru 2021 haree ba liña transmisaun bee-matan Loihunu to’o sidade Viqueque Vila.
“Ami-nia servisu hahú haree liña kontadór ba distribuisaun bee-moos ba komunidade munisípiu Viqueque no konsege hasai ligasaun ilegál no hasai sanyu sira iha zona ne’ebé konsidera zona mean. Nune’e, daudaun ne’e ami instala kontadór hamutuk unidade 113, hahú fulan-juñu to’o novembru,” nia akresenta.
Nia dehan, BTL,E.P sei kontinua esforsu hodi alarga distribuisaun bee-moos ba komunidade iha área urbana Viqueque.
“Ida-ne’e tama ona ba planu, agora ita labele implementa tanba iha ona fim do ano. Maibé ha’u sente tinan 2023 ita tama ona ba faze konkursu alarga sistema bee-moos iha sidade urbana sira,” nia tenik.
Daudaun funisionáriu sira ne’ebé serbisu iha BTL, E.P iha munisípiu Viqueque hamutuk na’in-14.
Jornalista : Vitorino Lopes da Costa
Editora : Julia Chatarina
