iklan

HEADLINE, MUNISÍPIU, VIQUEQUE

Abitante 7.335 iha suku Macadique simu Cesta Bázika

Abitante 7.335 iha suku Macadique simu Cesta Bázika

Abitante iha suku Macadique simu produtu Cesta Bázika, kuarta (23/11). Imajen Tatoli/Vitorino Lopes da Costa

VIQUEQUE, 23 novembru 2022 (TATOLI)—Abitante hamutuk 7.335 hosi aldeia 21 iha suku Macadique, postu administrativu Uatulari, munisípiu Viqueque, simu produtu Cesta Bázika faze daruak, ne’ebé distribui hosi empreza Coni-Dere, Unipesoal, Lda.

Tuir Xefe suku Makadique, Afonso dos Reis, laiha abitante mak rejeita simu produtu maibé iha abitante balun mak haruka empreza responsável distribuisaun troka produtu.

“Sira haruka empreza troka produtu hudi, nune’e empreza aseita no troka na’an ba benefisiáriu sira,” Autoridade suku Macadique ne’e hateten iha suku Macadique, kuarta ne’e.

Produtu ne’ebé fahe ba abitante sira mak hanesan mina, foos, sabaun, na’an-karau, ikan maran no seluk tan.

Notísia relevante: Abitante Ossorua 2.510 simu ona Cesta Bázika

Iha fatin hanesan, Reprezentante Benefisiáriu suku Macadique, Manuel da Silva, hateten, benefisiáriu balun husu atu inklui mós hahán nutrisaun hanesan foremungu no forekeli.

“Ami husu ba instituisaun relevante sira tenke akompaña distribuisaun hodi haree ba kuantidade no kualidade produtu sira ne’ebé empreza sira distribui ba ami iha suku ida-ne’e,” nia tenik.

Iha biban hanesan, Jerente empreza empreza Coni-Dere, Unipesoal, Lda, Sildonia de Carvalho, hateten, empreza liu konkursu Cesta Bázika hosi Sekretaria Estadu Kooperativa (SEKoop).

“Produtu ne’ebé ami prepara hanesan foos Timor, batar, ikan maran, sabaun, mina sona, mina virjen no na’an. Molok ami distribui, haruka uluk ami-nia ema mai suku Macadique hodi sosa produtu lokál hosi suku ida-ne’e, nune’e ami fahe formuláriu kada item sira, produtu balun iha no balun laiha. Produtu balun ne’ebé laiha suku ne’e ha’u ba buka fali produtu hosi suku seluk hodi kompleta item hosi Governu,” nia dehan.

Aleinde ne’e, nia garante produtu ne’ebé inklui iha Cesta Bázika ne’e 75% hanesan produtu lokál no importasaun 25%, tanba molok distribui ba benefisiáriu sira, parte Komisaun Antí-Korrupsaun (CAC, sigla portugés), Provedoria DIreitu Umanu no Justisa (PDHJ, sigla portugés no Autoridade Inspesaun no Fiskalizasaun Atividade Ekonomia Sanitária no Alimentár, Institutu Públiku (AIFAESA, I.P) no SEKoop halo inspesaun ba produtu sira iha armazen empreza iha Dili.

“Ha’u garante produtu sira ne’ebé ami distribui no molok distribui, autoridade relevante halo inspesaun hafoin ami distribui produtu ba benefisiáriu sira,” nia dehan.

SEKoop haruka dadus benefisiáriu ba empreza hamutuk 7.723, maibé balun laiha lista sei tama ba reklamasaun.

“Ami prontu distribui ba lista reklamasaun sira ne’ebé naran laiha lista,” nia hato’o.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!