Abitante Ossorua 2.510 simu ona Cesta Bázika
VIQUEQUE, 19 novembru 2022 (TATOLI)—Xefe suku Ossorua, postu administrativu Ossú, munisípiu Viqueque, Eduardo da Silva Freitas, informa abitante ka benefisiáriu hamutuk 2.510 no totál hamutuk uma kain 560 iha suku Ossorua simu ona sesta bázika hosi kompañia fornesedór.
Notísia Relevante: PN aprova millaun $40 ba SECoop implementa programa Cesta Bázika
“Antes kompañia manán-na’in distribui produtu ba komunidade, komapañia mai halo uluk diseminasaun ho ami kona-ba produtu sira-ne’ebé atu distribui ba koamunidade. Produtu sira ne’ebé iha momentu ne’ebá halo aproximasaun ho kompañia ne’e tanba iha fatin balun produtu la merese ba benifísiariu sira. Ho ida-ne’e, ami halo mudansa ba ba produtu sira-ne’ebé mak kominidade presiza,” Xefe suku ne’e inform aba Agência Tatoli, sábadu ne’e.
Autoridade suku Ossorua ne’e hatutan, suku Ossorua hamutuk aldeia ualu (8) ne’ebé kompañia fornesedór hahú distribui cesta bazika iha sesta (18.11 horisehik no ramata iha sabádu ne’e.
Distribuisaun produtu ba programa cesta bázika mak hanesan foos-rai, mina, sabaun, klin, batar, koto, masin-midar, kafé, masin no produtu sira seluk ne’ebé mak komapñia distribui ba komunidade Ossorua.
“Distribuisaun hahú horisehik to’o mai agora ne’e, ha’u haree ita-nia komunidade simu ho kontente tanba produtu sira-ne’ebé ita-nia Governu oferese no bele auguenta ba nesesidade uma laran. Maske buat balun mosu fallansu karik, maibé ha’u seidauk simu preokupasaun ruma hosi ita-nia komunidade,” nia dehan.
Benifísiaru hosi aldeia Uatulaua, suku Ossorua, Cesta da Costa Sarmento Guteres, haktuir nia parte la satisfa ba presu produtu ne’ebé Governu fó sai katak ema ida simu sasán presu hamutuk $50 maibé realidade hatudu sasán la to’o $50 nia folin.
“Produtu sesta bázika ne’ebé ami simu ladún satisfa tanba ami rona hosi mídia katak kada ema ida simu sasán ninia folin hamtuk $50, maibé ohin ami simu la tuir montante $50 nian. Ho ida-ne’e maka ami sente preokupa. Prokupasaun seluk mak labarik sira moris 2001 la simu programa cesta bázika, maibé ami hatene katak durante Governu fó sai labarik sira-ne’ebé sei iha inan ninia kanotak iha ona diretu, tanbasá mak labarik sira-ne’ebé moris ona laiha diretu simu programa cesta bázika,” nia hateten.
Tanba ne’e, nia fó hanoin ba Governu iha futuru kontinua implementa programa cesta bázika labele hamosu diskriminasaun ba labarik sira asesu ba programa refere.
Jerente Kompañia Fisudil Unipesoal, Lda, Agusto Angelino Ximenes, haktuir kompañia distribui ba suku tolu hanesan Nahareka, Uaibobo no Ossorua hetan komfiansa hosi Governu liuosi Sekretáriu Estadu Kooperativa (SECoop) ne’ebé liuhosi prosesu konkursu públiku.
“Hosi suku tolu ne’e kompañia distribui hotu, antes ami halo distribuisaun ami halo uluk sensibilizasaun ba autoridade lokál kona-ba item produtu sira-ne’e, hafoin ami halo distribuisaun ba benifísiariu sira iha suku tolu ne’e. Produtu sira-ne’ebé ami distribui ami garante kualidade ne’ebé di’ak mak ami diatribui ba benifísiariu sira,” nia dehan.
Durante hala’o distribuisaun ba pakote cesta bázika mak mosu fallansu ruma ne’e sai hanesan korajen ba kompañia hodi hadi’a iha loron aban.
Pakote cesta bázika ne’ebé kompañia distribui ba benefisiáriu sira mak protudu lokál 75% mai hosi povu agrikultór sira no produtu inportasaun 25% ne’e, kompañia prenxe rekizitu hosi parte Governu.
Jornalista : Vitorino Lopes da Costa
Editór : Cancio Ximenes
