iklan

BOBONARO, HEADLINE, MUNISÍPIU, POLÍTIKA

PA Bobonaro preokupa komunidade balun la hasa’e Bandeira RDTL iha uma oin

PA Bobonaro preokupa komunidade balun la hasa’e Bandeira RDTL iha uma oin

Prezidente Autoridade Munisipiu Bobonaro, Ernesto de Oliveira Barreto. Imajen Tatoli/Sérgio da Cruz.

BOBONARO, 23 novembru 2022 (TATOLI)-Prezidente Autoridade Munisípiu Bobonaro, Ernesto de Oliveira Barreto, preokupa ho komunidade balun ne’ebé kontinua la hasa’e Bandeira Repúblika Demokrátika Timor-Leste (RDTL) iha ida-idak nia uma oin.

Tanba atu selebra loron Proklamasaun Independénsia ba dala-47, falta de’it loron lima.

Notísia relevante: Postu Bobonaro sei komemora 28 novembru ho desportu komunitária

“Ha’u hatete tiha ona ba administradór postu, xefe suku no xefe aldeia sira, lololos ne’e loron 28 de novembru ne’e ita hatene ona, la presiza orientasaun, tinan-tina sempre hein orientasaun, ne’e labele, tenke ita hotu asume responsabilidade, tanba ita hotu hatene loron boot ne’e ita hotu nian,” nia nforma ba Jornalista sira, iha Maliana.

Ernesto hato’o prekupasaun ne’e tanba tinan-tinan komunidade laiha konsiénsia atu hasa’e Bandeira, liuliu iha tinan ida-ne’e tanba nia parte viajen hosi kapitál Maliana ba postu administrativu Cailaco, haree komunidade sira barak mak hasa’e bandeira nasaun seluk nian, maibé barak liu mak la hasa’e Bandeira RDTL.

“Ita fó hatene beibeik maibé realidade balun kontinua la hasa’e,” nia katak.

Tuir nia, povu hotu tenke respeita loron 28 novembru tanba iha loron ne’e mak Timor-Leste proklama independénsia unilateralmemte hodi hamriik nu’udar nasaun independente iha mundu nia leet ho ninia soberania rasik.

Administradór postu administrativu Cailaco, Alfredoedo Meta-Dau, haktuir iha semana rua liu ba nia parte fó ona orientasaun ba lideransa komunitária sira atu komunidade idak-idak hasa’e Bandeira Nasionál iha uma oin.

“Ami-nia haree buat sira-ne’e fila-fali ba karáter komunidade,nsira gosta liu hasa’e bandeira nasaun seluk, tanba eventu kopa mundiál, mais ita kontinua alerta ba xefe suku sira hodi orienta komunidade hasa’e bandeira iha uma oin,” nia hateten.

Notísia relevante: Autoridade Bobonaro realiza kompetisaun sertame ba funsionáriu públiku

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!