iklan

NASIONÁL, HEADLINE, POLÍTIKA

José Reis haruka karta ba Xanana Gusmão nu’udar promotór PED

José Reis haruka karta ba Xanana Gusmão nu’udar promotór PED

Vise-Primeiru-Ministru no Ministru Planu no Ordenamentu, José Maria dos Reis. Imajen Tatoli/Francisco Sony

DILI, 25 novembru 2022 (TATOLI)—Vise Primeiru-Ministru no Ministru Planu no Ordenamentu (MPO), José Maria dos Reis, hateten, nia parte haruka ona karta maka Kay Rala Xanana Gusmão nu’udar promotór ba PED.

“Kuandu atu hahú hala’o reajustamentu ba PED, ema dahuluk ne’ebé ha’u haruka karta mak Xanana Gusmão, ha’u husu ba nia liuhosi ha’u-nia karta ofisiál ida atubele hetan malu ho nia, husu ninia opiniaun, oinsá tempu ona ita atu halo reajustamentu PED ne’e ka lae tanba ha’u rona rona mós entrevista Xanana rasik iha tinan hirak ba kotuk, katak to’o tempu atu halo revizaun ba PED, signifika katak líder nasionál barak mak hanoin katak importante tebes atu halo revizaun ba dokumentu ne’e,” Ministru José Maria dos Reis, informa, iha programa entrevista eskluziva Agência Tatoli iha estúdiu, Farol, kinta (24/11).

Notísia relevante: Governu halo reajustamentu PED tanba foin atinje meta 53

Nune’e, resposta hosi karta ne’e simu filafali, katak Xanana momentu ne’ebá tempu laiha, maibé bainhira Ministru José Reis ko’alia ho Prezidente Repúblik, José Ramos Horta, husu atu nafatin atubele hetan malu ho Xanana tanba konsidera líder nasionál no promotór ba PED.

“Ha’u hanoin importante tebes atu husu nia opiniaun oinsá lori fali ita-nia prosesu ne’e ba dalan di’ak liu, nune’e povu moris ho hakmatek no di’ak,” nia akresenta.

VIII Governu Konstitusionál ninia planu prioridade ida iha mandatu maka halo reajustamentu ba PED tinan 2012-2030.

Governu liuhosi reuniaun Konsellu Ministru aprova ona Rezolusaun Governu ida hodi estabelese komisaun interministeriál, ne’ebé lidera direta hosi Taur Matan Ruak, no komisaun tékniku lideradu hosi Ministru Planu no Ordenamentu, José Maria dos Reis.

Bainhira Vise Primeiru-Ministru hasoru malu Prezidente Repúblika, hateten katak PED ne’e la’ós biblia ida atu labele muda, tanba ne’e to’o ona tempu tenke haree’

“Se iha nesidade atu halo revizaun, tenki halo no orienta filafali prosesu dezenvolvimetu ne’e la’o ba oin,” nia akresenta.

Aleinde ne’e, governante ne’e konsidera, konsultasaun públika ho líder polítiku sira importante tebes, tanba bele iha planu di’ak, tanba bainhira implementasaun atu la’o di’ak liu ne’e presiza ambiente polítikamente konsensuál.

“Se ita iha konsensu ida nível polítika, ha’u hanoin buat sira ne’e bele atinje tuir saida mak ita hakarak. Ne’ebé konsultasaun ne’ebé la’o ona ho polítiku balun mós ha’u hanoin la kleur tan komisaun sei aprezenta mós ba partidu polítiku sira Parlamentu Nasionál ho líder balun tan,” nia adianta.

VIII Governu Konstitusionál hakarak halo revizaun ba PED tanba tuir avaliasaun hosi Unidade Planeamentu, Monitorizasaun no Avaliasaun (UPMA) ne’ebé agora transforma ona ba Ajénsia Nasionál Planeamentu, Monitorizasaun no Avaliasaun (ANAPMA), liuhosi avaliadór independente ida katak tempu ona atu halo revizaun ba dokumentu estratéjiku ne’e.

Jornalista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!